Ci pajezdki Łukašenki ŭ Aman — prykmieta niepaźbiežnaha napadu Rasii na Jeŭropu praź Biełaruś?

U svaim novym videa ekanamist Siarhiej Čały zrabiŭ analiz apošniaha zamiežnaha turne Łukašenki i prapanavaŭ try viersii — małaimaviernuju, abnadziejvajučuju i piesimistyčnuju. Piesimistyčnaja, kali koratka, u tym, što Łukašenka dakładna viedaje pra płany Pucina napaści na Jeŭropu z uciahvańniem Biełarusi samym najbližejšym časam, a tamu i starajecca terminova prystroić niedzie u Amanie svaje hrošy, kab jany nie prapali. Ale biada Čałaha ŭ tym, što, robiačy svaje praroctvy, jon nie ličyć patrebnym zahłyblacca ŭ ahulny kantekst, piša Mikoła Buhaj.

Alaksandr Łukašenka. Fota: Contributor/Getty Images

Nielha vyklučać, što Rasija napadzie ci, chutčej, pasprabuje inšymi sposabami zrabić Jeŭropu padkantrolnaj, kali Jeŭropa budzie słaboj. Tamu hiensak NATA Mark Rute dy inšyja zaklikajuć niastomna ŭzmacniać Jeŭropu.

Rasija nie napadzie, kali Jeŭropa budzie mocnaj i pakul Jeŭropa budzie mocnaj. I adnaznačna Rasija nie napadzie pry ciapierašnim bałansie siłaŭ.

Adnak voś što novaje proci raniejšych časoŭ: masavaja vytvorčaść dronaŭ, rakiet i SPA dazvalaje źmianić hety bałans chutčej, čym raniej.

Kali raniej dla źmieny bałansu siłaŭ patrabavalisia dziesiacihodździ, to ciapier — hady.

Jeŭrapiejcy taksama bajacca situacyi, kali Kitaj ustupić u vajnu z ZŠA — jadziernuju ci niajadziernuju, za Tajvań ci ŭ inšym miescy. Takaja vajna zapatrabuje ŭsich siłaŭ ZŠA, a abarona Jeŭropy zastaniecca na samich jeŭrapiejcach — pryčym va ŭmovach poŭnaha razryvu raniejšych haspadarčych suviaziaŭ, pastavak kamplektoŭnych z Kitaja i Azii, kali papoŭnić reziervy stanie niemahčyma abo ciažka. Voś na vypadak takoj situacyi Jeŭropa musić być dastatkova padrychtavanaja, kab supraćstajać Rasii.

Situacyja ŭskładniajecca tym, što ŭ mnohich jeŭrapiejskich krainach ludzi nie hatovyja brać zbroju i vajavać. Heta značyć, vajavać daviadziecca adnosna małymi siłami. Situacyja ŭskładniajecca i tym, što dalnabojnaść i chutkaść zbroi značna ŭzrasła za apošni čas, a najaŭnych srodkaŭ SPA zamała, kab padavić tuju kolkaść dronaŭ, jakuju vyrablaje Rasija. 

Tamu: niepasrednaj pahrozy vajny zaŭtra niama, ale situacyja moža źmianicca praz paru hadoŭ.

Samy imavierny scenar u vypadku, kali ZŠA, Jeŭropa i Rasija nie dasiahnuć «novaj Jałty, novych Chielsinkaŭ» — heta zachavańnie napružanaści i hibrydnyja dziejańni Rasii i Biełarusi (dyviersii, padkopy, umiašańnie ŭ vybary, masavaja dezynfarmacyja, inšyja paskudstvy nakštałt mihrantaŭ i šaroŭ, jakija my ŭžo bačyli), supraćstajać jakim pakul nie asabliva jasna jak.

Mnohaje zaležyć i ad płanaŭ Kitaja, jakich nichto dakładna nie viedaje. Ci treba Kitaju mocny i samastojny Jeŭrasajuz? Ci chacieŭ by Kitaj, kab Jeŭrasajuz trapiŭ pad kantrol Rasii? Pa łohicy hieapalityki, chutčej pieršaje. Ale dla ažyćciaŭleńnia jaho niepasrednych płanaŭ (Tajvań) asłableńnie Zachadu Kitaju patrebnaje. Kitaj moža chacieć asłableńnia i Rasii, i Zachadu adnačasova.

Što važna razumieć: pamiatajecie, jak usie čakali padzieńnia Ukrainy, a jana vystajała? Rasija akazałasia zasłaboj va ŭsich płanach, akramia prapahandy i pijaru, kab pavalić Ukrainu. Dyk voś, Jeŭropa ŭ 10 razoŭ macniejšaja za Ukrainu.

My musim adsočvać prapahandu, ale nielha traplać da jaje ŭ pałon. Taja samaja Polšča macniejšaja za Ukrainu pa ŭsich paramietrach. I kali paŭstanie ekzistencyjnaja pahroza, to i palaki, i niemcy, i finy, i navat maleńkija estoncy buduć bicca z Rasijaj naśmierć. Ja dumaju, što, apiokšysia na Ukrainie, Rasija heta budzie razumieć. Jana budzie sprabavać padtačyć i kupić Jeŭropu ź siaredziny, jak kuplała mnohich jeŭrapiejskich palitykaŭ.

Ale navat kupiŭšy va Ukrainie Janukoviča, Azarava, Dzierkača, Miedviadčuka, klučavych piersanažaŭ, jana nie zmahła jaje pavalić. I dzie joj kupić estoncaŭ ci finaŭ?

Rasieja budzie staracca raspalvać nacyjanalizmy i ekstremizmy, sutykać nacyi Jeŭropy pamiž saboju, straŭlivać. U hetym najbolšaja niebiaśpieka pakul, a nie ŭ haračaj vajnie.

Tut taja situacyja (vielmi časta jana ŭ žyćci sustrakajecca), kali strach strašniejšy za samu niebiaśpieku, kali strach moža narabić bolš biady, čym sama pahroza. Bojciesia! Bojciesia! Bojciesia! — kryčać biełaruskija i rasijskija azaronki.

A što da vajažu ŭ Aman, to arabski kirunak byŭ u Łukašenkaŭ zaŭsiody. Tam možna hrošy:

1) vyhadna ŭkładać;
2) vyhadna pryciahvać;
3) vyhadna chavać.

Pryčym tut vajna? Łukašenka i syny zdaŭna paśviacca ŭ AAE. A ciapier prosta znajšli jašče placoŭku ŭ tym ža rehijonie. 

Kamientary da artykuła