Urad Litvy nie atrymlivaŭ paviedamleńnia pra namier Cichanoŭskaj pakinuć Vilniu

Paśla źjaŭleńnia infarmacyi, što Ofis Śviatłany Cichanoŭskaj moža pierajechać ź Vilni ŭ Varšavu, premjer-ministarka Litvy Inha Ruhinienie zajaviła, što aficyjnych paviedamleńniaŭ pra taki krok urad nie atrymlivaŭ, paviedamlaje Elta.lt.

Śviatłana Cichanoŭskaja. Fota: pres-słužba Cichanoŭskaj

Inha Ruhinienie padkreśliła, što kali Cichanoŭskaja prymie rašeńnie pakinuć Litvu, heta budzie jaje asabisty vybar.

Pavodle słoŭ kiraŭnicy litoŭskaha ŭrada, Litva zaŭsiody zabiaśpiečvała Cichanoŭskaj i jaje kamandzie ŭsiebakovuju padtrymku, u tym liku kruhłasutačnuju achovu.

10 śniežnia paviedamlałasia, što Cichanoŭskaja i častka jaje Ofisu rychtujucca da pierajezdu ŭ Varšavu, adnak kankretnaja data nie viadomaja. Pa infarmacyi «Naša Nivy», rašeńnie ŭžo było pryniataje.

Paźniej hałoŭny daradca Cichanoŭskaj Franak Viačorka zajaviŭ, što «nijakaha rašeńnia pra pierajezd niama».

Toje ž skazaŭ u kamientary «Lusterku» dypłamatyčny daradca Cichanoŭskaj Dzianis Kučynski. Jon zajaviŭ, što infarmacyja pra nibyta pierajezd nie paćvierdžanaja. Jon adznačyŭ, što kančatkovaje rašeńnie jašče nie pryniata, a pytańni biaśpieki ŭsio jašče abmiarkoŭvajucca z uładami Litvy. Pa jaho słovach, na nastupnym tydni Cichanoŭskaja budzie pracavać jašče ŭ Vilni.

Kamanda Cichanoŭskaj praciahvaje pracu ŭ zvyčajnym režymie. Učora sama demakratyčnaja lidarka znachodziłasia ŭ Osła, siońnia ŭ Rymie, ale praź niekalki dzion vierniecca ŭ Vilniu. Dzianis Kučynski padkreśliŭ, što klučavym faktaram pry lubym rašeńni budzie aficyjnaja pazicyja Litvy.

Raniej Litva pryniała rašeńnie skaracić fizičnuju achovu Cichanoŭskaj: z 1 kastryčnika jaje achova pierajšła ad Słužby achovy kiraŭnikoŭ dziaržavy da palicyi.

Kamientary da artykuła