U Hviniei-Bisau skinuli prezidenta, jaki paŭhoda tamu pryjazdžaŭ da Łukašenki

Prezident Hviniei-Bisau Umaru Sisoku Embało asabista patelefanavaŭ u redakcyju vydańnia Jeune Afrique i zajaviŭ: u krainie idzie vajskovy pieravarot, arhanizavany načalnikam Hienštaba vojska.

Umaru Sisoku Embało. Fota: Telmo Pinto/NurPhoto via Getty Images

Paźniej vajskoŭcy aficyjna abviaścili pra poŭnaje ŭziaćcie kantrolu nad krainaj.

Prezident Umaru Sisoku Embało zajaviŭ, što aryštavany ŭ vyniku dziaržaŭnaha pieravarotu. Pierad hetym 3 dni tamu ŭ krainie prajšli prezidenckija vybary, na jakich dziejny prezident abviaściŭ siabie pieramožcam z vynikam u 65%. Apazicyja z hetym nie pahadziłasia. 

U mai hetaha hoda Umaru Sisoku Embało pryjazdžaŭ u hości da Łukašenki ŭ Minsk.

Hvinieja-Bisau znachodzicca ŭ Zachodniaj Afrycy, z dvuch bakoŭ jaje akružajuć Sieniehał i Hvinieja. Heta adna z najbiadniejšych krain śvietu, pa VUP jana na 14‑m miescy z kanca.

Z 1980 hoda kraina pieražyła ŭžo dzieviać pieravarotaŭ i sprobaŭ pieravarotu.

Za ŭsiu historyju krainy z momantu zdabyćcia joj niezaležnaści mała jaki z prezidentaŭ zmoh pratrymacca va ŭładzie ŭsie naležnyja pa rehłamiencie piać hadoŭ. Umaru Sisoku Embało jakraz z takich, bo kiruje dziaržavaj z 27 lutaha 2020 hoda. Ale ŭ lutym 2022 hoda sproba vajskovaha pieravarotu tam užo była, jak taksama i ŭ 2023-m.

U Hviniei-Bisau vielizarny dziaržaŭny doŭh, kraina mocna zaležyć ad zamiežnaj dapamohi. U dadatak ź niekatorych časoŭ kraina stała pieravałačnym punktam dla narkotykaŭ z Łacinskuju Amieryki, tak što ciapier jaje navat nazyvajuć pieršaj afrykanskaj narkadziaržavaj.

Kamientary da artykuła