Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia
Jak stała viadoma «Našaj Nivie», u suviazi z kryminalnaj spravaj «Softkłuba» byŭ zatrymany Arciom Maroz, były vykanaŭčy dyrektar Banka raźvićcia, a na momant zatrymańnia — dyrektar Nacyjanalnaha centra elektronnych pasłuh. Maroz byŭ blizki da Alaksandra Jahorava, pieršaha namieśnika staršyni Nacbanka, jaki jašče niadaŭna adkazvaŭ za ekanomiku ŭ administracyi Łukašenki. Bolš za toje, žonka Alaksandra Jahorava — Nastaśsia Jahorava — z 2020 hoda pracuje ŭ «Softkłubie».
Arciom Maroz, były vykanaŭčy dyrektar Banka raźvićcia i dyrektar Nacyjanalnaha centra elektronnych pasłuh. Fota: skrynšot «Biełaruś 1»
Arciom Maroz — biełaruski funkcyjanier i bankir, čyja ekśpiertyza lažyć nie ŭ samich finansach, a ŭ infarmatyzacyi finansavych pasłuh.
Maroz pačynaŭ karjeru inžynieram-prahramistam u banku «Pošuk» (2002—2004), a ŭžo praz dva hady staŭ IT-dyrektaram u Biełaruskim narodnym banku.
Adtul Maroz pierajšoŭ na rabotu ŭ kampaniju «Softkłub» (2010-2016), a potym — u źviazany z «Softkłubam» servis ARIP (2016-2020).
Z 2020 pa 2025 hod Maroz pracavaŭ u Banku raźvićcia, spačatku načalnikam upraŭleńnia infarmacyjnych technałohij, potym — vykanaŭčym dyrektaram. U hety ž čas staršynioj Banka raźvićcia i pramym načalnikam Maroza byŭ jašče adzin vunderkind — Alaksandr Jahoraŭ, jakoha z Banka raźvićcia zabrali ŭ administracyju Łukašenki, a adtul — u namieśniki Ramana Hałoŭčanki ŭ Nacbanku.
U bankaŭskaj supolnaści pryniata ličyć, što Maroz i Jahoraŭ znachodziacca ŭ siabroŭskich adnosinach, a taksama što Jahoraŭ — pieršy namieśnik staršyni Nacbanka — realny šery kardynał bankaŭskaj sistemy. Jon «chłopiec, jaki ŭmieje ličyć» pry Hałoŭčanku, u jakoha niama bankaŭskaha vopytu.
Alaksandr Jahoraŭ, pieršy namieśnik staršyni Nacbanka. U minułym — namieśnik kiraŭnika Administracyi Łukašenki i staršynia praŭleńnia Banka raźvićcia. Fota: BiełTA
Arciomu Marozu paśla Banka raźvićcia taksama dali pasadu, adpaviednuju kampietencyjam, — u kastryčniku 2025‑ha jon staŭ dyrektaram NCEP (Nacyjanalny centr elektronnych pasłuh).
Ale vyhladaje, što Maroz nie adpracavaŭ na novaj pasadzie i miesiaca, jak byŭ zatrymany ŭ suviazi sa spravaj «Softkłuba» — maštabnaj karupcyjnaj spravaj, pa jakoj prachodzić mieniedžmient prynamsi — užo možna tak kazać — pałovy biełaruskich bankaŭ.
Proźvišča Marozava ŭžo źnikła z sajta NCEP, ciapier u raździele pra kiraŭnictva nazyvajucca tolki dva namieśniki dyrektara.
Surazmoŭcy «Našaj Nivy» źviazvajuć zatrymańnie Maroza ź jahonaj dziejnaściu ŭ Banku raźvićcia.
Jak admietny fakt možna taksama adznačyć, što žonka Alaksandra Jahorava — Nastaśsia Jahorava — z 2020 hoda pracuje ŭ «Softkłubie». Jana pierajšła tudy z pazicyi viadučaha ekanamista ŭ «Biełhazprambanku». Ź leta 2024 hoda Nastaśsia, kali vieryć infarmacyi ŭ jaje Linkedin, — hałoŭny biznes-analityk «Softkłuba» pa supraćdziejańni admyvańniu srodkaŭ i finansavańniu teraryzmu.
Ci fihuruje jana ŭ spravie «Softkłuba», nam pakul nieviadoma.
Nahadajem, sens spravy «Softkłuba» ŭ tym, što byccam by isnavała karupcyjnaja zmova pamiž kampanijaj-pastaŭščykom IT-rašeńniaŭ i mieniedžarami šerahu bankaŭ. Jany nibyta atrymlivali adkaty za łajalnaść da kankretnaha pastaŭščyka, ale ŭ pracesie jašče i kreatyŭna niedapłačvali padatki, što i stała pieršasnaj pryčynaj uvahi orhanaŭ.
Čytajcie taksama: Stała viadoma sutnaść spravy Softkłuba
Zatrymańni pačalisia 23 kastryčnika 2025 hoda z aryštu hienieralnaha dyrektara i stvaralnika kampanii «Softkłub» Uładzimira Sirotki.
Čytajcie: Sprava Softkłuba: zatrymany patryjarch biełaruskaha IT Uładzimir Sirotka i niekalki top-mieniedžaraŭ. Jany padaryli nam ARIP
Praz try dni, 26 kastryčnika, siłaviki pryjšli da staršyni praŭleńnia Ceptar Banka Alaksandra Ihnatava. Paźniej stała viadoma ab prablemach u staršyni banka VTB Uładzimira Lichadzijeŭskaha, a taksama ab zatrymańniach mieniedžaraŭ siaredniaha źviana ŭ Pryjorbanku. Byŭ zatrymany eks-kiraŭnik RRB-Banka Vital Drankievič, u minułym sam śledčy.
Kiraŭnictva «Softkłuba» abvinavačvajuć, jak viadoma «Našaj Nivie», va ŭchileńni ad padatkaŭ i dačy chabaru. Nijakaj aficyjnaj infarmacyi pra hetuju spravu jašče nie było.