Minskaje mietro zaśviaciłasia ŭ kanadskim filmie 20‑hadovaj daŭniny

Minski mietrapaliten padzialiŭsia ŭ svaim telehram-kanale videafrahmientam z kanadskaha filma Nature Unleashed: Earthquake («Ziemlatrus»), jaki vyjšaŭ u 2005 hodzie. Choć stužku nazyvajuć kanadskaj, u jaje vytvorčaści ŭdzielničali kampanii z Kanady, Litvy i Vialikabrytanii. Mietro prapanavała padpisčykam paznać, jakaja mienavita stancyja trapiła ŭ kadr, piša Blizko.by.

Skrynšot videa

U filmie sapraŭdy možna zaŭvažyć adrazu niekalki minskich stancyj. Spačatku hałoŭnaja hierainia zachodzić u ciahnik na stancyi «Maskoŭskaja». Ale ŭžo ŭnutry vahona pa hučnaj suviazi abviaščajuć zusim inšyja stancyi: «Akademija navuk», dalej — «Park Čaluskincaŭ». U realnym minskim mietro paradak stancyj inšy, tamu heta vyhladaje davoli kurjozna.

U vahonie taksama možna zaŭvažyć schiemy linij minskaha mietro, a pobač — jašče adnu schiemu, padobnuju da maskoŭskaj padziemki. Kali ciahnik adjazdžaje, scena ŭžo pieranosicca na stancyju «Park Čaluskincaŭ», što jašče raz paćviardžaje, što stvaralniki filma vykarystoŭvali roznyja zdymki i nie kłapacilisia pra adpaviednaść realnaści.

Pavodle siužetu, padziei adbyvajucca ŭ vydumanym rasijskim horadzie Kasursk — nibyta horadzie navukoŭcaŭ-jadravikoŭ. Pry hetym horad raźmieščany ŭ siejśmična niebiaśpiečnaj zonie, dzie i adbyvajecca mahutny ziemlatrus.

Film, darečy, atrymaŭ vielmi nizkija rejtynhi ad hledačoŭ: 3,7 z 10 na IMDb i 3,9 z 10 na sajcie «Kinopoisk». Tamu źjaŭleńnie minskaha mietro ŭ takoj stužcy mnohim padałosia chutčej zabaŭnym, čym hanarovym.

Kamientary da artykuła