Ministr zamiežnych spravaŭ Litvy: Hibrydnyja ataki mohuć być kryteryjem dla ŭviadzieńnia sankcyj suprać Biełarusi

20 listapada ministr zamiežnych spravaŭ Litvy Kiastucis Budrys udzielničaŭ u pasiadžeńni Rady zamiežnych spraŭ ES u Brusieli. Jon padkreśliŭ, što biełaruski režym užo nieadnarazova vykarystoŭvaŭ hibrydnyja ataki suprać dziaržavaŭ ES, a tamu nieabchodny mocny i adziny adkaz na heta.

Kiastucis Budrys. Fota: AP Photo / Mindaugas Kulbis

Kiastucis Budrys adznačyŭ, što kali strymlivańnie akazvajecca niedastatkovym, dyktatary pačynajuć novyja supraćpraŭnyja dziejańni. Sioleta heta byli kantrabandnyja apieracyi, što pieraškadžali hramadzianskaj avijacyi, parušali rejsy i vyklikali miljonnyja straty.

Jon zaklikaŭ ES prymać miery i pakazać, što hibrydnyja ataki suprać dziaržavaŭ-členaŭ nie buduć dapuščalnyja, u tym liku praz sankcyi, prapanoŭvajučy dadać da kryteryjaŭ dla ich uviadzieńnia hibrydnyja ataki.

Akramia taho, litoŭski ministr kazaŭ pra padtrymku Ukrainy. Jon padkreśliŭ, što dapamoha Ukrainie žyćciova važnaja dla ŭsioj Jeŭropy, i nieabchodna pryniać kankretnyja rašeńni nakont dalejšaj finansavaj padtrymki krainy ŭ baraćbie z rasijskaj ahresijaj.

Kiastucis Budrys zaklikaŭ vykarystać zamarožanyja rasijskija aktyvy dla dapamohi Ukrainie, adznačajučy, što kali nie budzie palityčnaj zhody i rašeńnia ciapier, to heta stvoryć prablemy ŭ pačatku nastupnaha hoda. Jon padkreśliŭ, što ES pavinien dziejničać praktyčna, a nie tolki demanstravać palityčnuju salidarnaść.

Kamientary da artykuła