U rasijskim KVZ Biełaruś pa-chamsku pakazali jak śmietnicu na pabiahuškach

Padčas fiestyvalu «Hołosiaŝij KiViN» adna z kamand pakazała numar, ad jakoha skryviacca nie tolki biełarusy, ale i łukašenkaŭskaja administracyja.

Momant vystupleńnia kamandy «Fłeš-Rajal». Tut i dalej skryn videa: 1tv.ru

U horadzie Śvietłahorsku, što ŭ Kalininhradskaj vobłaści, letam adbyŭsia štohadovy fiestyval «Hołosiaŝij KiViN». Pa telebačańni jaho pakazali niekalki dzion nazad. U hała-kancercie brali ŭdzieł 16 kalektyvaŭ. Siarod ich była kamanda z Rastova-na-Donie «Fłeš-Rajal».

Jana vykanała «pieśniu pra chutkuju admovu ad sankcyj».

A paźniej pakazała niečakany numar, jaki kapitan kamandy prakamientavaŭ nastupnym čynam:

«My zaŭvažyli, što miežy dziaržaŭ chutka mianiajucca. I nam zdajecca, što lahčej za ŭsio heta tłumačyć muzyčna».

Na scenu pastavili pamiežny słup. Pa pravy bok ad jaho (kali hladzieć z zały) staŭ kapitan ź vialikim bedžam sa ściaham Rasii. Pa levy bok pastavili členaŭ kamandy sa ściahami krain Bałtyi — Litvy, Estonii i Łatvii.

I pačałasia pantamima.

Litva ŭziała pamiežny słup i pačała jaho ruchać u bok Rasii. Jaje susiedzi vykazali adabreńnie. Adnak Rasija niekalki razoŭ pasunuła słup nazad, čym vyklikała niezadavolenaść apanientaŭ. U pošukach padtrymki krainy Bałtyi pahladzieli na ZŠA (ściah hetaj krainy ŭdzielnik kamandy trymaŭ dahary nahami).

U svaju čarhu ZŠA pačali hrać na dudzie. Krainy Bałtyi pačali pad jaje tančyć.

Rasija praciahnuła pasoŭvać pamiežny słup dalej na zachad. I ŭ peŭny momant zaprasiła trojcu pierajści na jaje bok, što jany i zrabili.

Zatym na scenie zastalisia tolki Rasija i ZŠA. Kapitan kamandy ŭ vobrazie Rasii padyšoŭ da sumnaha ŭdzielnika kamandy ź pierakulenym ściaham ZŠA i vypraviŭ pamyłku. A zatym zabraŭ dudu i pačaŭ na joj ihrać.

I tut na scenie źjaviŭsia udzielnik sa ściaham Biełarusi. Jon z zadavalnieńniem staŭ tančyć. 

Na joj zastalisia try krainy Bałtyi na baku Rasii. A ź levaha boku vyjšli členy kamandy sa ściahami asobnych krain Jeŭropy, a taksama Kanady.

Kali Rasija pačała hrać na dudzie, jany admovilisia tančyć. Zamiest hetaha pa čarzie stali vymać płastykavyja pakiety. Spačatku pakiety źjavilisia tolki ŭ levaj ruce kožnaha. Zatym — u pravaj. «Krainy» prademanstravali rašučaść svajho namieru.

Francyja, jakaja stajała bližej za ŭsich (praŭda ź pieraviernutym ściaham) źjedliva ŭśmichałasia ŭ bok Rasii i kiravała pracesam. Rasija ŭ svaju čarhu dastała vialiki pakiet dla śmiećcia i razharnuła. Krainy «kalektyŭnaha Zachadu» pakłali ŭ jaho svajo śmiećcie.

I tut na scenie znoŭ źjaviłasia Biełaruś ź vialikaj śmietnicaj u rukach i prapanavała svaje pasłuhi Rasii. Taja pakłała pakiet z sabranym jeŭrapiejskim śmiećciem u śmietnicu Biełarusi. Paśla čaho Biełaruś znoŭ źnikła sa sceny.

Paśla hetaha na scenie źjaviŭsia Kitaj. Jon pranios svoj pamiežny słup uzdoŭž usich krain Jeŭropy i staŭ cisnuć na ZŠA. Z druhoha boku krainu pamiežnym słupam prycisnuła Rasija. Astatnija moŭčki za hetym nazirali. 

U vyniku zładžanaha nacisku ZŠA vymušanyja byli sastupić. Pamiežny słup Rasii apynuŭsia pobač z kitajskim, i «krainy» pacisnuli ruki.

Numar skončyŭsia. Usie «krainy» pakinuli scenu. Biełarusi siarod ich nie było.

Jakaja ciapier Rasija, taki i humar KVZ.

Kamientary da artykuła