U ZŠA chodziać čutki vakoł Džej Dzi Vensa i ŭdavy Čarli Kirka

U ZŠA ŭžo niekalki dzion vyklikaje buru abmierkavańniaŭ karotki epizod, jaki adbyŭsia na scenie ŭniviersiteta Misisipi: abdymki pamiž vice-prezidentam Džej Dzi Vensam i Erykaj Kirk, udavoj zastrelenaha aktyvista i prychilnika Donald Trampa Čarli Kirka, piša Bild.

Eryka Kirk i Džej Dzi Vens

U ZŠA chodziać čutki vakoł Džej Dzi Vensa i ŭdavy Čarli Kirka Eryki. Novaj padstavaj dla śpiekulacyj stali ich ciopłyja abdymki na publičnym vystupleńni.

Na mierapryjemstva Turning Point USA — arhanizacyi Čarli Kirka, jakuju ciapier uznačalvaje Eryka Kirk — Vens byŭ zaprošany jak śpikier. Kali vice-prezident vyjšaŭ na scenu, Kirk sustreła jaho vielmi ciopłymi abdymkami: Vens pakłaŭ ruki joj na taliju, a jana praviała rukoj pa jaho vałasach.

U sacsietkach abmiarkoŭvajuć nie tolki sam žest, ale i ŭ cełym pavodziny Eryki paśla hibieli muža. Niekatoryja krytyki abvinavačvajuć jaje ŭ niedarečnych pavodzinach i praźmiernaj adkrytaści.

Sama Eryka pradstaviła Džej Dzi Vensa jak «svajho dobraha siabra», u jakoha jość padabienstva ź jaje niabožčykam mužam:

«Nichto nikoli nie zamienić majho muža. Ale ja baču niekatoryja padabienstvy pamiž im i vice-prezidentam Džej Dzi Vensam. Praŭda», — skazała jana ŭ pryvitalnaj pramovie.

Jak piša vydańnie People, na hetym mierapryjemstvie prysutničała i «druhaja łedzi» ZŠA Uša Vens. Džej Dzi Vens, katalik, žanaty z amierykankaj indyjskaha pachodžańnia i induistkaj z 2014 hoda, u pary troje dziaciej.

Padčas vystupu vice-prezident ZŠA paŭtaryŭ, što spadziajecca na mahčymaje naviartańnie žonki ŭ chryścijanstva:

«Ja vieru ŭ chryścijanskaje Jevanhielle i spadziajusia, što maja žonka adnojčy ŭbačyć heta taksama», — skazaŭ jon, adnak Uša Vens nie raz heta vyklučała.

Kamientary da artykuła