U Biełarusi znoŭ zahavaryli pra bliskučyja pierśpiektyvy na afrykanskim rynku

Jak paviedamiŭ vice-premjer Viktar Karankievič paśla narady ŭ Łukašenki, u najbližejšy čas pastaŭki biełaruskaj pradukcyi na afrykanski kantynient pavinny dasiahnuć jak minimum $1 młrd. Pavodle słoŭ čynoŭnika, apošnija dva hady nazirajecca stabilny rost ekspartu tavaraŭ i pasłuh, tamu ciapier pierad krainaj staviacca jašče bolš ambicyjnyja zadačy, piša BiełTA.

Łukašenku sustrakajuć u Zimbabve ŭ 2023 hodzie

«My pavinny pracavać dalej. Stavim bolš napružanyja zadačy. Treba pavialičvać minimum da $1 młrd pastaŭki pradukcyi na Afrykanski kantynient. Hetaja zadača staić, i ŭsie naceleny na jaje vykanańnie. Heta treba rabić chutka», — zajaviŭ Karankievič.

Afryka, adznačyŭ čynoŭnik, — vielmi pierśpiektyŭny rehijon. Biełaruś, pa jaho słovach, užo maje stanoŭčy vopyt pracy ź Nihieryjaj i Zimbabve. U hetych krainach vykarystoŭvajecca kompleksny padychod: spačatku pastaŭlajecca technika, stvarajucca servisnyja centry i navučajecca miascovy piersanał, paśla arhanizujecca zborka techniki, a ź ciaham času — sumiesnyja vytvorčaści, u tym liku pa pierapracoŭcy sielskahaspadarčaj pradukcyi.

Akramia ekanamičnych prajektaŭ, supracoŭnictva pašyrajecca i ŭ inšych śfierach — adukacyi i achovie zdaroŭja. Biełaruś hatova prymać studentaŭ i śpiecyjalistaŭ z afrykanskich krain, pieradavać vopyt u miedycynie i pastaŭlać abstalavańnie dy leki.

Taksama razhladajecca mahčymaść sumiesnych prajektaŭ u halinie raźviedki i zdabyčy karysnych vykapniaŭ. Jak adznačyŭ Karankievič, kožny taki prajekt budzie aceńvacca asobna — z ulikam ekanamičnaj metazhodnaści i kankretnych umoŭ.

Pra pierśpiektyvy afrykanskaha rynku biełaruskija čynoŭniki navat samaha vysokaha ŭzroŭniu havorać nie pieršy hod, ale časam siarod aptymistyčnych relacyj praskokvaje i rasčaravańnie. Tak, dva hady tamu tahačasny premjer-ministr Raman Hałoŭčanka kazaŭ, što dobryja adnosiny z kiraŭnictvam niekatorych krain kantynienta, a taksama palityčnyja kantakty na najvyšejšym uzroŭni nie dajuć kankretnych vynikaŭ u vyhladzie novych i paśpiachovych handlova-ekanamičnych prajektaŭ. Bolš taho — u handli z afrykanskimi krainami tady naziraŭsia navat niehatyŭny trend.

Kamientary da artykuła