Mantažniku optavałakna prysudzili 5,5 hoda kałonii za aktyŭnaść u telehramie. Spačatku — za kamientary, paśla — za Hajun

Ivan Kačanaŭ doŭhi čas pracavaŭ u roznych firmach, jakija zajmalisia stvareńniem optavałakonnych sietak. Paralelna jon napisaŭ bolš za 50 tysiač kamientaroŭ u telehramie, častka ź jakich — z palityčnych čataŭ. Ciapier jon za kratami, a niadaŭna jaho asudzili ŭ druhi raz.

Ivan Kačanaŭ. Fota ź jahonaha telehrama

Ivanu Kačanavu 36 hadoŭ. Jon minčuk. U 9‑m kłasie pajšoŭ u Minski dziaržaŭny vyšejšy radyjotechničny kaledž, jaki skončyŭ u 2011-m. Paśla pastupiŭ na skaročanaje zavočnaje (3,5 hoda) u Instytut infarmacyjnych technałohij BDUIR.

Jašče sa školnych hadoŭ jon cikaviŭsia sietkami. Ivan byŭ aktyŭnym karystalnikam foruma «Minskija chatnija sietki» (homenet.tut.by), jaki jadnaŭ karystalnikaŭ minskich pryvatnych sietak.

U kaledžy jon padpracoŭvaŭ roznarabočym. Paśla pracavaŭ technikam pa suviazi ŭ roznych kampanijach — ADA «Iziernat», ZAT «Soła» (pravajder Solo), Prajektna-vytvorčym architekturna-płanirovačnym biuro Minskaha rajvykankama, «Atłant-telekam» i inšych.

Apošnim časam Ivan pracavaŭ u kampanii «Biełenierha». Jaho praca — ustanoŭka i naładka optavałakonnych sietak i kamunikacyj.

Ivan Kačanaŭ na pracy. Fota ź jahonaha fejsbuka

Ivan Kačanaŭ vielmi aktyŭny telehram-kamientatar. Z 2019 pa 2025 hady jon pakinuŭ u adkrytych čatach bolš za 50 tysiačaŭ paviedamleńniaŭ. Bolšaja ich častka nie datyčnaja palityki.

Ivan vielmi šmat pisaŭ na prafiesijnych forumach — abmiarkoŭvaŭ technałohii, davaŭ prafiesijnyja parady pa mantažy i instrumientach dla sietak. Ivan vielmi lubić svaju pracu i šmat pracuje. Asabliva dastavałasia tym, chto prapanavaŭ schitryć ci zrabić pracu niajakasna. Udzielničaŭ jon i ŭ prafiesijnych kanfierencyjach — naprykład, MikroTik User Meeting u Minsku, kanfierencyi dla karystalnikaŭ sietkavaha abstalavańnia firmy MikroTik.

Ale pisaŭ jon i pra palityku. Kačanaŭ padtrymaŭ ruch za svabodnyja vybary i asudziŭ uvarvańnie Rasii va Ukrainu. Pry hetym jon krytykavaŭ Jeŭropu i NATA, vystupaŭ suprać ckavańnia biełarusaŭ za miažoj i suprać represij, a taksama suprać represij za ruskuju movu va Ukrainie, bo heta «raspalvaje ahresiju».

Ivan Kačanaŭ na pracy. Fota ź jahonaha fejsbuka

Ivana Kačanava zatrymali 12 lipienia 2024 hoda. Spačatku za kamientary ŭ telehramie. Akaŭnt Ivana zarehistravany na jaho ŭłasny numar, jaki jon nie chavaŭ. Taksama tam stajali jahonyja fota, tamu adšukać jaho siłavikam było nieskładana.

Dakładnaja sutnaść abvinavačańniaŭ nieviadomaja, ale asudzili Ivana pa troch artykułach — «udzieł u dziejańniach, jakija hruba parušajuć hramadski paradak» (č. 1 art. 342 KK), «padrychtoŭka da raspalvańnia varožaści hrupaj asobaj abo jakoje paciahnuła śmierć čałavieka ci inšyja ciažkija nastupstvy» (č. 3 art. 130 KK praz č. 1 art. 13 KK) i «raspalvańnie varožaści» (č. 1 art. 130 KK). Za heta jamu prysudzili 5 hadoŭ kałonii.

Praz dva tydni paśla etapa ŭ kałoniju suprać jaho zaviali novuju kryminalnuju spravu — za Hajuna. Ivana asudzili za «sadziejničańnie ekstremisckaj dziejnaści» (č. 1 i č. 2 art. 361‑4 KK).

Ahulny prysud Ivanu — piać z pałovaj hadoŭ kałonii.

Kamientary da artykuła