Na čempijanat śvietu pa futbole vyjšła zbornaja krainy, čyj ściah paraduje voka mnohich biełarusaŭ
Zbornaja Kaba-Verde siensacyjna zavajavała pucioŭku na čempijanat śvietu 2026 hoda, upieršyniu ŭ svajoj historyi vyjšaŭšy na hałoŭny futbolny turnir płaniety.
Astraŭnaja afrykanskaja dziaržava z nasielnictvam usiaho kala 600 tysiač čałaviek vyjhrała svaju adboračnuju hrupu, pakinuŭšy zzadu Kamierun, Liviju, Anhołu, Maŭrykij i Esvacini.
Vyrašalnym staŭ zaklučny tur, u jakim zbornaja Kaba-Verde ŭpeŭniena abyhrała zbornuju Esvacini ź likam 3:0. Dziakujučy hetaj pieramozie «sinija akuły» apiaredzili Kamierun na 4 ački ŭ tablicy hrupy D.
Kamieruncy, u svaju čarhu, zhulali ŭničyju z Anhołaj i ciapier pasprabujuć prabicca na mundyjal praz stykavyja matčy.
Pajezdka na čempijanat śvietu stanie histaryčnaj padziejaj dla Kaba-Verde, na ściahu jakoha jość siarod inšaha miłyja sercu biełarusaŭ bieł-čyrvona-biełyja pałosy.
Kaba-Verde stała 22‑j kamandaj, jakaja atrymała pucioŭku na čempijanat śvietu 2026 hoda. Raniej stała viadoma, što ŭ finale mundyjalu voźmuć udzieł Mieksika, ZŠA, Kanada, Japonija, Iran, Paŭdniovaja Kareja, Iardanija, Aŭstralija, Uźbiekistan, Novaja Ziełandyja, Arhiencina, Ekvador, Brazilija, Kałumbija, Uruhvaj, Parahvaj, Maroka, Tunis, Jehipiet, Ałžyr i Hana.
Biełaruskaja zbornaja paśla ŭčarašniaha projhryšu zbornaj Šatłandyi straciła navat tearetyčnyja šancy trapić na hety čempijanat. Pakul jana ŭ adboračnym turniry navat nie nabrała nivodnaha bała, usie biez vyklučeńnia matčy prajhranyja.
Čytajcie taksama:
Zbornaja Fareraŭ — bolš nie futbolny karlik. Jany majuć čatyry pieramohi ŭ adbory
Zbornaja Biełarusi pa futbole znoŭ prajhrała šatłandcam u adboračnym matčy. Zatoje choć raz zabili