Prezident Madahaskara zajaviŭ pra sprobu vajskovaha pieravarotu
Prezident Madahaskara Andry Radzuelina zajaviŭ, što ŭ krainie adbyvajecca sproba niezakonnaha i niekanstytucyjnaha zachopu ŭłady. Praź niekalki hadzin paśla taho vajskovaje padraździaleńnie CAPSAT (karpus kadravych i administracyjna-techničnych słužbaŭ) abjaviła, što pieraniała kiravańnie vajennym kamandavańniem i ciapier kantraluje ŭsie ŭzbrojenyja siły — suchaputnyja, pavietranyja i marskija. Hetaje padraździaleńnie raniej adyhrała klučavuju rolu ŭ palityčnym kryzisie 2009 hoda, jaki pryvioŭ Andry Radzuelinu da ŭłady, piša Bi-bi-si.
Padčas pratestaŭ u Antananaryvu. Fota: Rafalia Henitsoa/Anadolu via Getty Images
Pratesty na Madahaskary pačalisia 25 vieraśnia. Spačatku ludzi vyjšli suprać adklučeńniaŭ vady i elektryčnaści, ale chutka demanstracyi pieraraśli ŭ šyrejšaje niezadavalnieńnie ŭradam Radzueliny z-za vysokaha ŭzroŭniu biespracoŭja, karupcyi i rostu cenaŭ. U subotu niekatoryja sałdaty pakinuli kazarmy na ŭskrainach stalicy krainy Antananaryvu i dałučylisia da pratestoŭcaŭ pierad haradskoj radaj.
CAPSAT asudziła vykarystańnie siły siłavymi strukturami padčas razhonu apošnich pratestaŭ u Antananaryvu. Adnačasova administracyja prezidenta zajaviła, što Andry Radzuelina i novy premjer-ministr Rufin Zafisamba — hienierał armii, pryznačany napiaredadni — kantralujuć situacyju.
Zhodna z danymi AAN, z pačatku pratestaŭ u Madahaskary zahinuli 22 čałavieki, ale prezident krainy nazvaŭ hetyja ličby «pamyłkovymi» i śćviardžaje, što zahinuli 12 čałaviek, jakich jon acharaktaryzavaŭ jak «maradzioraŭ i vandałaŭ».
U zajavie Radzueliny havorycca, što sproba zachopu ŭłady źjaŭlajecca poŭnym parušeńniem Kanstytucyi i demakratyčnych pryncypaŭ. Jon zaklikaŭ usie klučavyja siły krainy abjadnacca dla abarony kanstytucyjnaha paradku i nacyjanalnaha suvierenitetu.
CAPSAT abviaściła ab pryznačeńni hienierała Demaśfiena Pikułasa novym načalnikam štaba. U niadzielu ranicaj pastupili paviedamleńni pra pierastrełki ŭ łahiery CAPSAT padčas pieramoŭ z žandarmieryjaj. Padrabiaznaściaŭ pakul niama.
Čytajcie taksama:
Francyja viartaje Madahaskaru čerap miascovaha karala, jakomu adsiekli hałavu 128 hadoŭ tamu
Były prezident Brazilii Bałsanaru asudžany na 27 hadoŭ turmy za padrychtoŭku vajennaha pieravarotu
«Jany horšyja za francuzaŭ, my trapili z ahniu dy ŭ połymia». Jak «Vahnier» pravaliŭsia ŭ Mali