Varšaŭski šełtar dla palitviaźniaŭ nie apyniecca na vulicy z novaha hoda
Kiraŭnička šełtara Hanna Fiedaronak raspaviała «Našaj Nivie», što pytańnie ź finansavańniem atrymałasia vyrašyć jašče na hod, dziakujučy Mižnarodnamu humanitarnamu fondu, jaki ŭziaŭ biełarusaŭ pad svaju apieku, kali navisła ryzyka prypynieńnia ich pracy.
Kiraŭnička šełtara Hanna Fiedaronak. Fota: «Naša Niva»
U vieraśni my pisali, što los šełtara, jaki nazyvajuć Cieramkom, byŭ tumanny: arenda doma ŭ Varšavie na 20 čałaviek razam z kamunałkaj abychodzicca amal u čatyry tysiačy jeŭra, i takija hrošy donar vydzialaŭ tolki da kanca 2025 hoda.
Hanna Fiedaronak pieražyvała, što razam z palitviaźniami i nažytaj za hady technikaj i meblaj na Novy hod apyniecca na vulicy, ale pakul možna vydychnuć.
«Hety dom na Bałotnaj zastajecca za nami jašče na hod —staršynia Narviežskaha chielsinkskaha kamiteta i člen Mižnarodnaha humanitarnaha fondu Bieryt Lindeman była ŭ nas jašče ŭ vieraśni, jany paabiacali ŭziać na siabie vydatki za dom na 2026 hod».
Akramia taho, Hanna Fiedaronak nie hublaje nadziei, što polskija ŭłady vydzialać im dadatkovy, bolš prastorny zakinuty dom, jaki b dazvoliŭ prymać bolš ludziej.
«My płanujem zasialić u siabie častku hrupy palitviaźniaŭ, vyzvalenaj u vieraśni, kali ŭ ich vyrašycca pytańnie z dakumientami. Nichto nie vyklučaje, što ludziej buduć vypuskać z turmaŭ i dalej — pytańnie ich raźmiaščeńnia vielmi aktualnaje. Akramia taho, my chacieli b dapamahać našym represavanym piensijanieram, tamu padčas vizitu da nas dyrektara Varšaŭskaj meryi Mitaša Hosa i jaho sakratara Małhažaty Zakreŭskaj my abaznačyli, što marym pra dom chacia b na 50 miescaŭ, a lepš na 100 — čym bolš, tym lepš.
My daŭno i stała prasoŭvajem heta pytańnie z Paŭłam Łatuškam, nakiroŭvali list śpiecpradstaŭniku MZS Polščy Adamu Chałacinskamu. Ciapier nam paabiacali, što naš zapyt budzie vyrašacca na ŭzroŭni prezidenta Polščy», — raspaviała Hanna.
Taksama kiraŭnička šełtara padzialiłasia, što z kastryčnika bolš nie supracoŭničaje z ByHelp, i płanuje adkryvać ułasny fond, kab napramuju zajmacca spravami šełtara.