Tramp vystaŭlaje Jeŭrasajuzu ŭmovy, jakija toj nie moža vykanać

Pavodle infarmacyi vydańnia The Wall Street Journal, atrymanaj ad nienazvanych jeŭrapiejskich dypłamataŭ, pamiž ZŠA i Jeŭrapiejskim Sajuzam uźnikli roznahałośsi adnosna ŭzmacnieńnia sankcyj suprać Rasii. Spačatku jeŭrapiejskija krainy sprabavali nacisnuć na prezidenta ZŠA Donalda Trampa, kab jon padtrymaŭ bolš žorstkija abmiežavańni. Adnak Tramp vyviernuŭ situacyju ŭ inšy bok i zaklikaŭ Jeŭropu admovicca ad zakupak rasijskaj nafty, a taksama ŭvieści mytnyja pošliny suprać Indyi i Kitaja.

Ursuła fon der Lajen i Donald Tramp. Fota: Andrew Harnik/Getty Images

Jeŭrapiejskija lidary pakul adkłali novy, užo 19‑y pakiet sankcyj, kab uzhadnić, jak zrabić jaho bolš efiektyŭnym. Staršynia Jeŭrakamisii Ursuła fon der Lajen zajaviła, što novyja abmiežavańni pavinny zakranuć bankaŭskuju śfieru Rasii, jaje kryptavalutny i enierhietyčny rynki.

Tramp ža prapanavaŭ vykarystoŭvać zamarožanyja rasijskija aktyvy, jakija zachoŭvajucca ŭ Bielhii, dla dapamohi Ukrainie. Pytańnie vykarystańnia hetych aktyvaŭ u Jeŭropie ŭžo abmiarkoŭvajecca, choć raniej krainy ES bajalisia, što taki krok paškodzić reputacyi hetaha abjadnańnia.

Situacyja pakazvaje, što paśla taho, jak ZŠA spynili pramuju vajskovuju dapamohu Ukrainie, Jeŭropa sutyknułasia ź ciažkaściami ŭ kaardynacyi svajoj palityki adnosna Rasii. Raniejšyja pakiety sankcyj nie zdoleli istotna asłabić rasijskuju vajennuju mašynu, a abiacanaja zakupka amierykanskaj zbroi dla padtrymki Kijeva zaciahvajecca. Akramia taho, šerah krain ES pa-raniejšamu zaležać ad rasijskaj nafty i hazu.

Dypłamaty ES ličać, što Tramp vystaŭlaje ŭmovy, jakija Jeŭropa ŭsio adno nie moža vykanać. Tak jon moža paźbiehnuć nieabchodnaści ŭzmacniać ułasny cisk na Rasiju.

Poŭnaja admova ad rasijskaj nafty i sankcyi suprać Indyi i Kitaja vyhladajuć nadzvyčaj składanymi dla ES. Fon der Lajen nastojvaje na tym, kab admovicca ad zakupki rasijskich enierharesursaŭ da 2027 hoda, adnak hetamu mohuć pieraškodzić Vienhryja i Słavakija. Pry hetym adznačajecca, što asabistyja suviazi premjera Vienhryi Viktara Orbana z Trampam mohuć zrabić jaho bolš uraźlivym da amierykanskaha cisku.

WSJ padkreślivaje, što prablema zakranaje nie tolki nievialikija krainy ES. Francyja, Hiermanija i Italija taksama praciahvajuć kuplać rasijskija enierharesursy.

U dadatak da hetaha Jeŭropa adchiliła ideju vykarystańnia mytnych pošlin suprać Indyi i Kitaja, addajučy pieravahu indyvidualnym sankcyjam suprać kampanij i asobaŭ, jakija abychodziać abmiežavańni.

U novym pakiecie sankcyj mohuć apynucca niekalki kitajskich kampanij. Raniej ES uvioŭ sankcyi suprać adnaho bujnaha indyjskaha naftapierapracoŭčaha zavoda, ale šyrejšyja miery suprać Indyi małavierahodnyja, pakolki Brusel, naadvarot, imkniecca zaklučyć ź joj pahadnieńnie ab svabodnym handli.

Kamientary da artykuła