Śviatłana Cichanoŭskaja ŭdzielničała ŭ mižnarodnym stratehičnym forumie ŭ Słavienii
1—2 vieraśnia demakratyčnaja lidarka Śviatłana Cichanoŭskaja ŭziała ŭdzieł u mižnarodnym stratehičnym forumie ŭ słavienskim Bledzie. U hetym forumie taksama ŭdzielničali kiraŭniki jeŭrapiejskich instytucyj, prezidenty, premjery, ministry i pradstaŭniki vajskovych struktur ź Jeŭropy i ZŠA, paviedamlaje pres-słužba palityka.
Śviatłana Cichanoŭskaja z prezidentkaj Słavienii Natašaj Pirc-Musar. Fota: Ofis Śviatłany Cichanoŭskaj
U svaim vystupie na forumie Cichanoŭskaja ŭźniała temy budučyni Biełarusi paśla pieramien, roli krainy ŭ jeŭrapiejskaj supolnaści, scenaryjaŭ raźvićcia padziej u rehijonie. Taksama Cichanoŭskaja raskazała pra pracu demakratyčnych siłaŭ, pieraśled luboha inšadumstva u Biełarusi i prablemy, ź jakimi sutykajucca biełarusy za miažoj. Jana zaklikała padtrymlivać žurnalistaŭ, pravaabaroncaŭ i kulturnyja prajekty, a taksama padkreśliła niebiaśpieku straty niezaležnaści praz padparadkavanaść režymu Łukašenki Maskvie.
Akramia vystupu, Cichanoŭskaja praviała šerah sustreč: z prezidentkaj Słavienii Natašaj Pirc-Musar, ministarkaj zamiežnych spraŭ Słavienii Taniaj Fajon, jeŭrakamisarkaj Chadžoj Łachbib, pradstaŭnikami Ukrainy i inšymi dypłamatami. Asobna jana sustrełasia ź dziaržaŭnym sakratarom MZS Hiermanii Fłaryjanam Chanam. Na hetaj sustrečy abmiarkoŭvali padtrymku niezaležnych ŚMI, pracu pa zbory dokazaŭ złačynstvaŭ režymu, padrychtoŭku da vizitu ŭ Bierlin i prablemy biełarusaŭ z dakumientami ŭ Hiermanii.
Na zakrytych sustrečach havaryli i pra mahčymyja novyja zachady dziela vyzvaleńnia palitviaźniaŭ.
Na zaviaršeńnie vizitu Cichanoŭskaja naviedała horad Krań, dzie adkryłasia vystava fatohrafa Paŭła Kryčko, pryśviečanaja padziejam 2020 hoda. Taksama jana dała šerah intervju słavienskim, charvackim i mižnarodnym ŚMI.
Čytajcie taksama:
Jeŭrapiejskim čynoŭnikam rassyłajucca paviedamleńni ad fejkavaha Cichanoŭskaha
Mižnarodny humanitarny fond dapamohi achviaram represij raskazaŭ pra svaju dziejnaść