Va Ukrainie padali pazoŭ u sud ab likvidacyi Kijeŭskaj mitrapolii UPC Maskoŭskaha patryjarchatu

Va Ukrainie Dziaržaŭnaja słužba pa etnapalitycy i svabodzie sumleńnia (DSESS) padała ŭ sud pazoŭ ab likvidacyi Kijeŭskaj mitrapolii Ukrainskaj pravasłaŭnaj carkvy Maskoŭskaha patryjarchatu (UPC MP). Pra heta 2 vieraśnia paviedamiŭ kiraŭnik słužby Viktar Jalenski.

Maskoŭski patryjarch Kirył i kijeŭski mitrapalit Anufryj

DSESS dziejničaje pavodle zakonu «Ab abaronie kanstytucyjnaha ładu ŭ śfiery dziejnaści relihijnych arhanizacyj». Kali jość źviestki pra mahčymuju suviaź relihijnaj arhanizacyi z Ruskaj pravasłaŭnaj carkvoj (RPC), słužba pravodzić acenku i adpaviednaje rasśledavańnie.

Pravierka pakazała, što UPC MP dahetul źjaŭlajecca častkaj RPC. Tamu mitrapolii było vystaŭlena čatyry patrabavańni:

• Kijeŭskaja mitrapolija pavinna pryniać rašeńnie ab vychadzie z Maskoŭskaha patryjarchatu.
• Kijeŭski mitrapalit pavinien damahčysia pryznańnia, što apošni statut RPC nie dziejničaje dla Ukrainskaj carkvy.
• Kijeŭski mitrapalit musić publična zajavić pra niezadavolenaść svaim pryznačeńniem Sinodam RPC.
• Kiraŭničyja orhany UPC pavinny nie pryznavać anieksiju jeparchij RPC na ŭschodzie Ukrainy i ŭ Krymie.

Na vykanańnie patrabavańniaŭ byŭ adviedzieny termin da kanca žniŭnia 2025 hoda. Ale, pavodle słoŭ Viktara Jalenskaha, zamiest supracoŭnictva mitrapolija dasłała supiarečlivy list, tamu spravu nakiravali ŭ sud.

Kali sud prymie rašeńnie na karyść DSESS, Kijeŭskaja mitrapolija stracić status jurydyčnaj asoby, ale asobnyja prychody zmohuć dziejničać aŭtanomna i zachavać niezaležnaść.

28 žniŭnia DSESS aficyjna pryznała Kijeŭskuju mitrapoliju UPC MP afilijavanaj z RPC, dziejnaść jakoj u Ukrainie zabaronienaja. U samoj mitrapolii zajavili, što nie zhodnyja z hetym rašeńniem, bo infarmacyja była atrymanaja z dakumientaŭ z Rasii, a nie sa statuta UPC MP.

Kamientary da artykuła