Mižnarodny humanitarny fond dapamohi achviaram represij raskazaŭ pra svaju dziejnaść

Mižnarodny humanitarny fond dapamohi achviaram represij u Biełarusi (MHF), stvorany dla padtrymki biełaruskich palitźniavolenych i ich siemjaŭ, z momantu zasnavańnia pryciahnuŭ ad vaśmi krain-donaroŭ 2 025 408 jeŭra i ŭžo raźmierkavaŭ 1 315 970 jeŭra. Pra heta paviedamiła kiraŭnictva fondu na pres-kanfierencyi ŭ Vilniusie, dzie taksama raskazali pra strukturu arhanizacyi i adkazali na pytańni žurnalistaŭ i aktyvistaŭ, piša Reform.news.

Krainy-donary Mižnarodnaha humanitarnaha fondu

Fond nie źjaŭlajecca jurydyčnaj asobaj i niepasredna ź fizičnymi asobami nie pracuje — heta niefarmalnaje abjadnańnie piaci biełaruskich pravaabarončych arhanizacyj, pradstaŭniki jakich uvachodziać u kiraŭničy orhan. Kiravańnie fondam ažyćciaŭlaje Narviežski Chielsinkski kamitet (NCHK), jaki prymaje i pieraličvaje srodki partnioram i maje prava vieta, što dazvalaje zabłakavać luboje rašeńnie fondu.

Siońnia ŭ kiraŭničy orhan uvachodziać fondy «Kraina dla žyćcia», Dissidentby, Bysol, niekamiercyjnaja arhanizacyja INeedHelpBY, inicyjatyva Volnyja i NCHK. Raniej u pracy ŭdzielničaŭ taksama fond Byhelp, jaki pakinuŭ MHF paśla rasśledavańnia NCHK, jakoje vyjaviła ŭciečku danych i adsutnaść ahulnych pratakołaŭ pa ich abaronie. 

Fond maje taksama naziralnuju radu z pradstaŭnikami mižnarodnych arhanizacyj, imiony ŭsich členaŭ pakul nie raskryvajucca ź mierkavańniaŭ biaśpieki. U budučyni płanujecca pašyryć kolkaść členaŭ rady.

Žurnalistaŭ cikaviła, čamu ŭ kiraŭničy orhan byli ŭklučanyja mienavita hetyja arhanizacyi. Pradstaŭniki MHF adznačyli, što inicyjatarami stvareńnia fondu vystupili mienavita hetyja arhanizacyi i Śviatłana Cichanoŭskaja. Fond maje praceduru ŭstupleńnia: novyja arhanizacyi mohuć atrymać status haściavych biez prava hołasu, a paśla pravierki nadziejnaści — dałučycca da kiraŭničaha orhana. Na hety momant adna arhanizacyja znachodzicca na stadyi padpisańnia kantraktu, adna — na razhladzie, try — na stadyi pieramoŭ.

Padčas pres-kanfierencyi byli ahučanyja finansavyja pakazčyki dapamohi praz partniorskija arhanizacyi:

• Dissidentby: atrymana — 80 995,75 jeŭra, vydatkavana — 76 905,75 jeŭra;
• Volnyja: atrymana — 0 jeŭra;
• «Kraina dla žyćcia»: atrymana — 141 696,89 jeŭra, vydatkavana — 109 745,41 jeŭra;
• INeedHelpBY: atrymana — 65 083,5 jeŭra, vydatkavana — 59 730 jeŭra;
• Bysol: atrymana — 401 735,18 jeŭra, vydatkavana — 354 735,18 jeŭra.

Kožnaja arhanizacyja maje svaju śpiecyjalizacyju i isnuje sistema abarony ad dvajnoha finansavańnia adnaho i taho ž kiejsa. Bysol praciahvaje pracavać u kiraŭnictvie MHF, adnak Andrej Stryžak adłučany ad kiraŭničych i pradstaŭničych funkcyj u vyniku rasśledavańnia, jakoje praciahvajecca da 11 vieraśnia.

Kiraŭnictva fondu taksama zaprašaje ŭsie pravaabarončyja arhanizacyi dałučacca da pracy MHF i, paśla pravierki nadziejnaści, uvajści ŭ kiraŭničy orhan.

Kamientary da artykuła