Načalnik rasijskaha Hienštaba zajaviŭ, što Rasija budzie praciahvać vajnu

Načalnik Hienieralnaha štaba Rasii Valeryj Hierasimaŭ zajaviŭ, što Rasija praciahnie vajnu suprać Ukrainy i budzie vieści nastupalnyja dziejańni. Jon udakładniŭ zadačy dla vojskaŭ na vosieński pieryjad, padvioŭšy vyniki viasnova-letniaj kampanii 2025 hoda. Pavodle jaho słoŭ, «stratehičnaja inicyjatyva całkam naležyć rasijskaj armii».

Valeryj Hierasimaŭ. Fota: Sefa Karacan/Anadolu Agency via Getty Images

Hierasimaŭ śćviardžaje, što vojski Rasii ciapier kantralujuć amal usiu Łuhanskuju vobłaść (99,7%), a taksama 79% Danieckaj, 74% Zaparožskaj i 76% Chiersonskaj. Adnačasova jon apraŭdvaŭ masavyja rakietnyja ŭdary pa Ukrainie 28 i 30 žniŭnia, u vyniku jakich u Kijevie zahinuli 25 čałaviek, u tym liku dzieci. Aficyjna ŭdary nibyta nanosilisia pa «abjektach VPK», ale paciarpieła cyvilnaja infrastruktura.

Pavodle roznych acenak, pad kantrolem Rasii ciapier kala 20% terytoryi Ukrainy, pryčym bolšaść jaje ŭdałosia zachapić ci zadoŭha da poŭnamaštabnaj vajny, ci ŭ pieršyja tydni ŭvarvańnia. Za 1010 dzion vajny RF zdoleła zaniać tolki kala 0,97% płoščy krainy.

Nastupleńnie supravadžajecca vielizarnymi stratami. Vašynhtonski CSIS aceńvaje straty Rasii prykładna ŭ 1 miljon čałaviek (250 tysiač zahinuli, 400 tysiač stali invalidami). Brytanskaja raźviedka padaje padobnyja ličby, a pavodle daśledavańnia «Mieduzy» i «Miedyjazony», zasnavanaha na analizie Rejestra spadčynnych spraŭ, pa stanie na kaniec žniŭnia 2025 hoda zahinuli ŭžo kala 220 tysiač rasijskich vajskoŭcaŭ.

Padliki The Economist pakazvajuć: letam 2025 hoda rasijskaja armija traciła adnaho sałdata za kožnyja 0,038 km² prasoŭvańnia. Pry takich tempach vyjści da administracyjnych miežaŭ akupavanych abłaściej možna nie raniej za 2029 hod, a poŭny zachop Ukrainy zaniaŭ by kala 89 hadoŭ.

Kamientary da artykuła