U Kazachstanie raptam admianili kancert Maksa Karža. Heta ŭžo druhi raz

U Ałmaty admianili kancert biełaruskaha repiera Maksa Korža, jaki byŭ zapłanavany na 6 vieraśnia 2025 hoda. Dyrekcyja spartyŭnych zbudavańniaŭ horada paviedamiła, što arhanizatary nie padali ŭsich nieabchodnych dakumientaŭ dla zaklučeńnia damovy, a taksama isnujuć ryzyki paškodžańnia hazona na Centralnym stadyjonie.

Maks Korž. Skrynšot ź videa

U viedamstvie padkreślili, što dla padrychtoŭki areny da takich maštabnych mierapryjemstvaŭ patrebna ad 10 da 20 dzion, a času ŭžo nie zastałosia. Tamu kancert pryznali niemahčymym i ź jurydyčnaha, i z techničnaha boku.

Asobna adznačana, što vialikija kancerty ź dziasiatkami tysiač hledačoŭ psujuć hazon i paharšajuć umovy dla futbolnych matčaŭ. Pytańni ź viartańniem kvitkoŭ treba vyrašać praz arhanizataraŭ i miescy prodažu.

Aficyjna admova sa skandałam vakoł niadaŭniaha vystupu Karža ŭ Varšavie nie źviazanaja. Sam vykanaŭca situacyju pakul nie kamientavaŭ.

Heta ŭžo druhaja admiena kancerta Karža ŭ Ałmaty. Amal hod tamu, u kastryčniku 2024 hoda, vystup taksama sarvaŭsia «pa techničnych pryčynach».

Kamientary da artykuła