Vens zajaviŭ pra hatoŭnaść Pucina da «vialikich kampramisaŭ» pa Ukrainie
Značnyja kampramisy z boku Rasii na šlachu da miru z Ukrainaj užo zroblenyja, zajaviŭ vice-prezident ZŠA Džej Dzi Vens u intervju telekanału NBC. Jon adznačyŭ, što choć vidavočnych prykmiet chutkaha zaviaršeńnia kanfliktu pakul niama, prahres u pieramovach usio ž bačny.
Džej Dzi Vens. Fota: Kent Nishimura / Getty Images
Džej Dzi Vens skazaŭ, što prezident Rasii Uładzimir Pucin pajšoŭ na šerah sastupak, u tym liku pahadziŭsia na nadańnie Kijevu harantyj biaśpieki. Pa jaho słovach, heta pieršy raz za try z pałovaj hady kanfliktu, kali Rasija prapanavała značnyja kampramisy.
Raniej ministr zamiežnych spraŭ Rasii Siarhiej Łaŭroŭ adznačaŭ, što harantami biaśpieki Ukrainy pavinna stać hrupa krain, uklučajučy členaŭ Rady Biaśpieki AAN. Ukraina pry hetym pavinna zastavacca biaźjadziernaj, niejtralnaj i nie ŭvachodzić u vajskovyja błoki.
Prezident ZŠA Donald Tramp raniej adznačaŭ mahčymaść uviadzieńnia novych sankcyj suprać Rasii, kali za dva tydni nie budzie dasiahnuty prahrec u miratvorčym urehulavańni. Vens udakładniŭ, što sankcyi buduć razhladacca indyvidualna, bo jany nie abaviazkova prymusiać Rasieju da spynieńnia ahniu. U jakaści prykładu cisku dla dasiahnieńnia miru jon pryvioŭ 25%-ja dadatkovyja pošliny na tavary ź Indyi, abvieščanyja Trampam u pačatku žniŭnia.
Čytajcie taksama:
Tramp tak i nie ŭvioŭ sankcyi suprać Rasii i Pucina. Ci varta vieryć jaho novym pahrozam?
Paśla kanfliktu ź Zialenskim Vens zvaniŭ Załužnamu. Toj nie ŭziaŭ trubku