Dla biełarusaŭ mianiajecca paradak ujezdu ŭ Łatviju. Jak jon pavinien pracavać užo z 1 vieraśnia

Na pieršy dzień vosieni pryznačany zapusk novaj pracedury pierasiačeńnia miažy Łatvii hramadzianami šerahu trecich krain — u tym liku i Biełarusi. Płanujecca papiaredniaja padača źviestak pra siabie i čakańnie dazvołu (ci admovy) na ŭjezd. Miechanizm technična abapirajecca na elektronnuju sistemu, a jurydyčna — na praviły Kabinieta ministraŭ. Za niapoŭnyja dva tydni da pryznačanaha terminu i toje, i druhoje znachodziłasia ŭ stadyi raspracoŭki, vyśvietliła vydańnie LSM+ u MUS. Taksama heta vydańnie daviedałasia ŭ čynoŭnikaŭ, jak novaja sistema pavinna budzie pracavać.

Papraŭki ŭ Zakon ab imihracyi łatvijski Siejm unios sioleta 3 krasavika. U jakaści pryčyny nazyvałasia nieabchodnaść umacavańnia nacyjanalnaj biaśpieki i achovy miežaŭ.

Abnoŭleny zakon tyčycca hramadzian trecich krain (mnohich, ale nie ŭsich), kali jany žadajuć ujechać u krainu nie pa łatvijskaj vizie abo dazvole na žycharstva, a pa niejkim inšym dakumiencie (naprykład, vizie inšaj krainy Šenhienu). Jon vyznačaje, jakuju mienavita infarmacyju pra siabie i svaju pajezdku jany pavinny padać i ŭ jaki termin (48 hadzin), adnak nie źmiaščaje nijakaj kankretyki adnosna taho, jakim mienavita čynam hetyja źviestki treba pierasłać, u jakoj formie i jakomu viedamstvu.

LSM+ nakiravaŭ profilnym viedamstvam śpis pytańniaŭ i atrymaŭ adkazy ad Departamienta stratehičnaj kamunikacyi MUS.

Hałoŭnaje

«U hety momant płanujecca, što z 1 vieraśnia

padača infarmacyi budzie ažyćciaŭlacca na sajcie (eta.gov.lv) u vyhladzie adkazaŭ na raźmieščanyja tam pytańni»,

— havorycca ŭ atrymanym 15 žniŭnia LSM+ liście MUS. Asoba, jakaja žadaje ŭjechać u Łatviju,

«ciaham 48 hadzin paśla padačy danych na sajcie eta.gov.lv atrymaje paviedamleńnie na paznačany joj adras elektronnaj pošty»,

taksama paviedamiła viedamstva.

Pa źviestkach na ranicu 20 žniŭnia sistema jašče niedastupnaja: adkryvajecca pustaja staronka z hierbam Łatvii, paviedamleńniem «Nie znojdziena» i zaprašeńniem źviartacca z pytańniami ŭ Centr absłuhoŭvańnia MUS (kantakty pryvodziacca). Adnak MUS zapeŭnivaje, što da 1 vieraśnia sajt eta.gov.lv zapracuje.

Nieabchodnyja dla zapusku ŭsioj sistemy praviły Kabiniet ministraŭ pryniaŭ da viečara 19 žniŭnia.

Inšyja asablivaści novaj sistemy

Bolšaja častka pierapiski z MUS pryvodzicca ŭ farmacie pytańnie-adkaz ź minimalnymi skaračeńniami. Aryhinał adkazaŭ — tut.

Jakuju mienavita infarmacyju nieabchodna padać?

— Z 1 vieraśnia nie paźniej čym za 48 hadzin da ŭjezdu ŭ Łatviju padajucca źviestki pra:

• metu pajezdki (ujezdu);
• płanavany termin i miesca znachodžańnia;
• maršrut pajezdki;
• kantaktnuju infarmacyju;
• vybarnyja pasady, jakija zajmaje sam čałaviek abo jaho svajaki;
• udzieł u vybarach u jakaści kandydata;
• były abo dziejny status dziaržaŭnaj ci municypalnaj słužbovaj asoby;
• słužbu va Uzbrojenych siłach, śpiec– i pamiežnaj słužbie, mytni abo ŭ orhanach unutranych spraŭ, justycyi ci zamiežnych spraŭ (u tym liku dypłamatyčnaj słužbie).

Ci dazvolena padać źviestki raniej, čym za 48 hadzin? Kali tak, to pačynajučy ź jakoha momantu?

— Ciapier ustanoŭleny tolki minimalny termin, tamu zapatrabavanyja źviestki možna padać i raniej, čym za 48 hadzin. (Nakolki «raniej», MUS nie ŭdakładniła. — LSM+). Adnačasova treba sačyć, kab padadzienaja infarmacyja była praŭdzivaj, heta značyć adpaviadała faktyčnym abstavinam.

Jak dziejničać padarožniku, kali jaho płany źmianilisia da pajezdki?

— Nie paźniej čym za 48 hadzin da ŭjezdu ŭ Łatviju padać adpaviednyja faktyčnym abstavinam źviestki, pry nieabchodnaści ŭdakładniŭšy raniej padadzienyja.

Ci moža inšaja asoba (naprykład, svajak, jaki žyvie ŭ ES) padać infarmacyju zamiest taho, chto ŭjazdžaje? 

— Zapatrabavanyja źviestki pavinien padać zamiežnik asabista. Dadatkova treba ŭličvać, što zhadanyja papraŭki da Zakona ab imihracyi dla zamiežnikaŭ praduhledžvajuć i administracyjnuju adkaznaść za niepadaču zapatrabavanych źviestak albo padaču niapoŭnych ci niesapraŭdnych.

Ci ličycca padadzienaja infarmacyja «dekłaratyŭnaj», ci łatvijskija ŭstanovy buduć praviarać jaje sapraŭdnaść?

— Sutnaść papravak zaklučajecca ŭ tym, kab abaviazać hramadzian trecich krain da ŭjezdu ŭ Łatviju padavać pra siabie pieraličanyja vyšej źviestki, jakija ŭstanovy dziaržaŭnaj biaśpieki i pravaachoŭnyja orhany mohuć vykarystoŭvać dla vyjaŭleńnia i papiaredžańnia ryzyk dla biaśpieki dziaržavy i hramadstva.

U vypadkach, kali takija ryzyki buduć kanstatavanyja, kampietentnyja dziaržaŭnyja ŭstanovy vykarystoŭvajuć najaŭnyja pravavyja instrumienty dla praduchileńnia pahrozy, u tym liku i praz abmiežavańnie mahčymaści ŭjezdu ŭ Łatviju kankretnaj asoby.

Patłumačcie, kali łaska, na prykładach, jak dziejničać tamu, chto ŭjazdžaje, u kankretnych vypadkach, kali jon:

a) Hramadzianin Biełarusi z polskim dazvołam na žycharstva i płanuje ŭjechać i pierasiačy Łatviju «čystym» tranzitam. U jaho niama ni znajomych/svajakoŭ, ni adrasa, ni numara telefona ŭ Łatvii.

b) Hramadzianin Biełarusi z hrečaskaj vizaj płanuje ŭjechać i «pa darozie» pravieści ŭ Łatvii niekalki dzion. U jaho niama ni znajomych/svajakoŭ, ni adrasa, ni numara telefona ŭ Łatvii.

— Jon pavinien zapoŭnić ankietu [na eta.gov.lv], padaŭšy najaŭnyja ŭ jaho rasparadžeńni źviestki, i čakać, pakul nie budzie hatovaje adpaviednaje paćvierdžańnie, jakoje budzie nakiravana jamu na paznačany adras elektronnaj pošty roŭna praz 48 hadzin paśla zaniasieńnia infarmacyi ŭ sistemu. Źviestki pra znajomych i svajakoŭ u Łatvii [u taho, chto ŭjazdžaje], nie zapytvajucca. Nieabchodna paznačyć kantaktnuju infarmacyju, z dapamohaj jakoj možna źviazacca z tym, chto ŭjazdžaje.

Papraŭki raspaŭsiudžvajucca na ŭsich paznačanych u Zakonie ab imihracyi hramadzian trecich krain, u jakich niama vydadzienaj Łatvijaj vizy abo dazvołu na žycharstva — niezaležna ad taho, pierasiakaje zamiežnik Łatviju tranzitam ci Łatvija źjaŭlajecca metaj jaho pajezdki.

Koła asob, na jakich raspaŭsiudžvajecca abaviazak padavać źviestki: usie tyja zamiežniki, jakija nie źjaŭlajucca hramadzianami ES, dziaržaŭ — členaŭ NATA, Arhanizacyi ekanamičnaha supracoŭnictva i raźvićcia, Jeŭrapiejskaj ekanamičnaj zony, Šviejcaryi abo Brazilii, i ŭ jakich niama vydadzienaj Łatvijaj vizy abo dazvołu na žycharstva. 

Kamientary da artykuła