Arabskija dziaržavy zaklikali CHAMAS pajści z Hazy i razzbroicca

Arabskija krainy, u tym liku Katar, Saudaŭskaja Aravija i Jehipiet, zaklikali hrupoŭku CHAMAS pakinuć siektar Haza i pieradać zbroju Palestynskaj aŭtanomii. Hety zvarot byŭ ahučany padčas kanfierencyi ŭ Ńju-Jorku, pryśviečanaj adnaŭleńniu idei stvareńnia dźviuch dziaržaŭ — Izraila i Paleściny, paviedamlaje Euronews.

Žančyna ŭ Hazie. Fota: Majdi Fathi/NurPhoto via Getty Images

U vyniku kanfierencyi było pryniata 7-staronkavaje rašeńnie, u jakim CHAMAS prapanujuć admovicca ad ułady ŭ Hazie na karyść zakonnaj paleścinskaj administracyi.

Paleścinski premjer Muchamied Mustafa vystupiŭ z zaklikam i paviedamiŭ, što hatovy pryciahnuć mižnarodnyja siły dla adnaŭleńnia i zabieśpiačeńnia biaśpieki ŭ rehijonie.

Jeŭrasajuz i Liha arabskich dziaržaŭ padtrymali hety dakumient, čakajecca, što jaho aficyjna zaćvierdziać u AAN da vieraśnia. Da hetaha času da inicyjatyvy mohuć dałučycca inšyja krainy.

Ministr pa jeŭrapiejskich spravach Francyi nazvaŭ hetuju dekłaracyju «histaryčnaj i biesprecedentnaj». Taksama hrupa z 15 zachodnich krain na čale z Francyjaj zaklikała pryznać niezaležnuju paleścinskuju dziaržavu. Padpisanty patrabujuć, kab CHAMAS vyzvaliŭ izrailskich zakładnikaŭ i vystupajuć za nieadkładnaje spynieńnie vajennych dziejańniaŭ u Hazie, jakija praciahvajucca ŭžo amal dva hady.

ZŠA i Izrail nie ŭdzielničali ŭ kanfierencyi, ličačy, što stvareńnie paleścinskaj dziaržavy mienavita ciapier — heta padtrymka teraryzmu.

Kamientary da artykuła