U Maskvie paviedamili pra stvareńnie pad vybary ŭ Małdovie prarasijskaha błoka
Prarasijski palityčny błok «Pieramoha», jakim z-za miažy kiruje aliharch Iłan Šor, płanuje ŭdzielničać u vosieńskich parłamienckich vybarach. Na čale jaho źbirajucca pastavić baškana Hahauzii, jakaja ciapier znachodzicca pad sudom, paviedamlaje rasijskaje ahienctva Sputnik.
Iłan Šor na źjeździe ŭ Maskvie. Fota: Sputnik
Na źjeździe ŭ Maskvie Iłan Šor paviedamiŭ, što ŭžo na nastupnym tydni buduć padadzienyja dakumienty dla rehistracyi błoku. Na čale śpisu kandydataŭ stanie kiraŭnica Hahauzii Jaŭhienija Hucuł, jakaja zaraz znachodzicca pad sudom u Małdovie pa spravie ab niezakonnym finansavańni partyi «Šor».
Šor śćviardžaje, što vybary buduć «brudnymi», a ŭłady nibyta pasprabujuć źniać ich błok z udziełu. Jon taksama abviaściŭ pra pačatak zboru podpisaŭ za sajuz Małdovy z Rasijaj i zajaviŭ, što ich meta — źviaržeńnie ciapierašniaj ułady i praviadzieńnie daterminovych vybaraŭ. Akramia taho, Šor zajaviŭ, što Małdova pavinna dałučycca da ADKB — vajskova-palityčnaha sajuza na čale z Rasijaj.
Raniej prajeŭrapiejskaja prezidentka Małdovy Maja Sandu kazała, što Rasija moža vykarystać situacyju ŭ Prydniastroŭi dla diestabilizacyi krainy napiaredadni vybaraŭ. A vice-premjerka Kryścina Hierasimava padkreśliła, što Małdova imkniecca pačać pieramovy ab ustupleńni ŭ Jeŭrasajuz jašče da pryznačanych na vierasień vybaraŭ, kab supraćdziejničać rasijskaj dezynfarmacyi.
Čytajcie taksama:
Prakuratura Małdovy patrabuje pryhavaryć kiraŭničku Hahauzii da dzieviaci hadoŭ turmy