U Pinsku ładziać vytvorčaść račnych sudnaŭ
Na Pinskim sudnabudaŭničym i sudnaramontnym zavodzie płanujuć naładzić vytvorčaść nievialikich račnych sudnaŭ. Pra heta paviedamiŭ kiraŭnik Bresckaha abłvykankama Piatro Parchomčyk padčas vizitu ŭ Pinsk.
Pinski sudnabudaŭničy i sudnaramontny zavod. Fota: Jandeks-Karty
Pavodle słoŭ čynoŭnika, ciapier iduć pieramovy pra budaŭnictva sudnaŭ. Padpisańnie kantraktaŭ na 10 roznych typaŭ sudnaŭ znachodzicca na finalnaj stadyi. Heta tolki pieršy krok — dalej płanujecca, što pradpryjemstvy z rasijskaha Nižniaha Noŭharada dapamohuć naładzić vytvorčaść sudnaŭ niepasredna ŭ Biełarusi.
Aproč rasijskich partnioraŭ, viaducca pieramovy i ź inšymi krainami. U lipieni čakajecca pryjezd pradstaŭnikoŭ z Kitaja, jakija mohuć prapanavać svaje idei.
Parchomčyk adznačyŭ, što padpisany ŭkaz Łukašenki ab raźvićci Pinskaha zavoda. Pradpryjemstva pačynaje ramont starych sudnaŭ i pastupova adnaŭlajecca, choć znachodzicca ŭ stanie sanacyi. Dla dalejšaha raźvićcia, na jahonuju dumku, patrebnyja mocny kiraŭnik, novaja kamanda i adpaviednyja viedy.
Meta — stvaryć pradpryjemstva, zdolnaje vypuskać nievialikija račnyja sudny, jakija spatrebiacca dla raźvićcia vodnaha turyzmu. Heta daść mahčymaść turystam padarožničać pa biełaruskich rekach, adpačyvać i atrymlivać asałodu ad pryrody.
Parchomčyk taksama adznačyŭ, što turystyčny patencyjał Bresckaj vobłaści vykarystoŭvajecca niedastatkova. Novyja mahčymaści vodnaha transpartu mohuć stać jašče adnym šlacham dla pavieličeńnia ekspartu i pryciahnieńnia turystaŭ.
Čytajcie taksama:
U Viciebsku na vadu spuścili novy ciepłachod
U Homieli zapuskajuć račny tramvaj
Biznesoviec z Homiela pieratvaryŭ debarkadar u płyvučy hatel