Biełaruska ŭ Francyi pieratvaraje plamy ad kavy ŭ mastactva
Safija Viasna, mastačka i aktrysa, naradziłasia ŭ Biełarusi, vyrasła ŭ Japonii, a ciapier žyvie ŭ Francyi. Adnym ź jaje zachapleńniaŭ stała stvareńnie malunkaŭ ź plam kavy, što niadaŭna pryciahnuła ŭvahu presy ŭ Narmandyi, piša «Biełaruś i mir».
Mastačka Safija Viasna. Fota ź jaje asabistaha archiva
Safija nanosić kavu na papieru kroplami, pyrskajučy z pendźlika, a kali plamy vysychajuć, to dapaŭniaje klaksy tonkaj asadkaj, pieratvarajučy ich u fihury ludziej, žyvioł, raślin abo fantastyčnych istot. Uvieś praces jana pakazvaje ŭ žyvym efiry ŭ TikTok i Twitch, razmaŭlajučy z hledačami na roznych movach i vykarystoŭvajučy ich prapanovy dla transfarmacyi plam.
Tak vyhladaje kava-art. Fota z asabistaha archiva Safii Viasny
Svajo mastactva Safija nazyvaje «espresa» — słova, jakoje i aznačaje vid kavy, i pierakładajecca ź italjanskaj jak «vyrazny, dakładny».
Hatovyja raboty jana pradaje praz ułasny sajt, afarmlajučy ich u ramki z buka pad arhškłom. Košt adnoj kavy-karciny — ad 120 jeŭra, u zaležnaści ad farmatu.
Niadaŭna jaje pracy ekspanavalisia ŭ Bierne (Narmandyja) u kaviarni La Brulerie de Bernay, dzie mastačka i nabyvaje hvatemalskuju kavu dla svajoj tvorčaści.
Jašče trochi kava-artu. Fota z asabistaha archiva Safii Viasny
Safija Viasna naradziłasia ŭ 1995 hodzie ŭ Minsku, z 6 da 19 hadoŭ žyła ŭ Tokia, potym pierajechała ŭ Paryž, a ciapier žyvie ŭ Narmandyi. Malavańniu navučałasia samastojna, natchniajučysia ilustracyjami Ivana Bilibina, dyśniejeŭskaj animacyjaj, japonskimi hraviurami ŭkijo-e, multfilmami studyi Ghibli, tvorami Edvarda Chopiera i Salvadora Dali. Jana pracuje hrafitnym ałoŭkam i toj ža kapilarnaj asadkaj-linieram.
Akramia mastactva, Safija z 6 hadoŭ zajmajecca madelnaj i akciorskaj dziejnaściu. Vučyłasia muzyčnamu teatru ŭ Łondanie, a dramatyčnamu mastactvu — u paryžskaj škole Cours Florent.
Kadr z karotkamietražnaha filma Kreskine. Vyjava: oriGine films
U 2022 hodzie źniałasia ŭ sieryjale The New Look pra Kryścijana Dziora i Kako Šanel, a ŭ 2023 — u karotkamietražnym filmie Kreskine pra znakamitaha mientalista Džordža Kreskinie. Jana vałodaje ruskaj, japonskaj, francuzskaj i anhlijskaj movami.
Postar i kadr ź sieryjała The New Look. Vyjava: Apple TV+
Čytajcie taksama:
U Francyi padčas muzyčnaha fiestyvalu 145 čałaviek ukałoli šprycami
Biełaruska stała ŭ Ispanii buktokierkaj i napisała raman pra «Formułu-1»