Tramp paraiŭ Dźmitryju Miadźviedzievu nie kidacca słovami pra jadziernuju zbroju

Prezident ZŠA Donald Tramp rezka adreahavaŭ na słovy namieśnika staršyni Rady biaśpieki Rasii Dźmitryja Miadźviedzieva pra mahčymuju pieradaču Iranu jadziernaj zbroi. Miadźviedzieŭ pierad tym raskrytykavaŭ niadaŭnija amierykanskija avijaŭdary pa iranskich jadziernych abjektach i zajaviŭ, što niekatoryja krainy hatovyja dać Iranu jadziernyja bojehałoŭki ŭ adkaz.

Donald Tramp. Fota: AP / Alex Brandon

U adkaz Tramp napisaŭ u sacsietcy Truth Social, što ZŠA vałodajuć «najlepšaj i najmahutniejšaj zbrojaj u śviecie» — u tym liku atamnymi padvodnymi łodkami i vysokadakładnymi rakietami «Tamahaŭk», jakimi niadaŭna byli naniesienyja ŭdary pa Iranie. Jon padkreśliŭ, što abychodzicca z «jadziernaj rytorykaj» varta vielmi aściarožna, i spytaŭ, ci sapraŭdy Miadźviedzieŭ kazaŭ pra pieradaču jadziernaj zbroi Tehieranu.

«Mnie pačułasia, ci były rasijski prezident Miadźviedzieŭ niadbajna kidaŭsia «słovam na litaru N (Nuclear — «jadzierny») i kazaŭ, što jon i inšyja krainy buduć pastaŭlać jadziernyja bojehałoŭki Iranu? Jon sapraŭdy tak kazaŭ ci heta prosta płod majho ŭjaŭleńnia? Kali jon tak skazaŭ i kali heta paćvierdzicca, kali łaska, dajcie mnie znać nieadkładna. Da «słova na litaru N» nielha stavicca tak niadbajna. Dumaju, mienavita tamu Pucin Boss», — napisaŭ Tramp u paście.

Raniej, u noč na 22 červienia, ZŠA atakavali try iranskija jadziernyja abjekty — u Natanzie, Isfachanie i Fardo. U apieracyi vykarystoŭvalisia stratehičnyja bambaviki i bomby, zdolnyja prabivać bunkiery. Tramp abviaściŭ apieracyju paśpiachovaj i adznačyŭ, što dziejańni ZŠA i Izraila byli apraŭdanymi na fonie praciahłaj antyamierykanskaj rytoryki z boku Irana.

U adkaz Miadźviedzieŭ abvinavaciŭ Trampa ŭ raźviazvańni novaha kanfliktu i zajaviŭ, što Tramp, jaki nibyta pryjšoŭ u palityku jak «mirotvorac», ciapier pačaŭ novuju vajnu. Ci budzie Rasija sapraŭdy pieradavać Iranu jadziernuju zbroju, jon nie paćvierdziŭ, ale nahadaŭ pra «stratehičnaje partniorstva» pamiž dźviuma krainami, zamacavanaje ŭ damovie 2024 hoda.

Kamientary da artykuła