ZŠA pieramiaščajuć vajskovyja samaloty ŭ rehijon Mižziemnaha mora

Pavodle infarmacyi Euronews, avijacyjnyja źniščalniki i samaloty-zapraŭščyki vylatajuć ź jeŭrapiejskich baz u napramku Blizkaha Uschodu, što supadaje z čutkami pra mahčymy ŭdzieł Vašynhtona ŭ vajennych dziejańniach suprać iranskich jadziernych i vajskovych abjektaŭ u padtrymku Izraila.

Fota: AP Photo

17 červienia paviedamlałasia, što amierykanskija samaloty F-15E, F-35, F-16CJ/DJ i F-16C/D byli pierakinutyja z baz u Vialikabrytanii, Hiermanii i Italii ŭ napramku Blizkaha Uschodu. Samaloty-zapraŭščyki KC-135 Stratotanker byli zaŭvažanyja nad Mižziemnym moram kala Italii. Paviedamlajecca, što padobnyja pieramiaščeńni mohuć śviedčyć pra naroščvańnie vajskovaha patencyjału ZŠA ŭ rehijonie.

Stan na 17 červienia. Krynica: Evergreen Intel, X

Na hetym fonie Donald Tramp zrabiŭ šerah rezkich zajaŭ, uklučajučy zaklik da evakuacyi z Tehierana i namioki na mahčymaść masiravanych udaraŭ. Jon taksama pakinuŭ samit G7 u Kanadzie daterminova, zajaviŭšy, što «nam patrebna niešta bolšaje, čym spynieńnie ahniu».

Izrailski bok, u svaju čarhu, taksama vykazvajecca rezka: ministr abarony Izraila zaklikaŭ da evakuacyi žycharoŭ Tehierana i zhadaŭ padziemny jadzierny centr Fardo jak «prablemu, jakuju buduć vyrašać». Praŭdapadobny navat scenar zabojstva iranskaha lidara — pra heta ŭ intervju ABC News zajaviŭ premjer-ministr Izraila Bińjamin Nietańjachu, adznačyŭšy, što heta «spynić, a nie ŭzmocnić kanflikt».

U ES, miž tym, zaniepakojenyja mahčymym udziełam ZŠA ŭ vajnie. Kaja Kałłas, kiraŭnica jeŭrapiejskaj dypłamatyi, zajaviła, što heta «ŭciahnie ŭvieś Blizki Uschod u šyroki kanflikt», što nie adpaviadaje intaresam nivodnaha boku.

Tym časam u Tehieranie nazirajecca panika — ludzi masava pakidajuć horad, u jakim žyvie kala 10 miljonaŭ čałaviek. Vializnyja zatory na darohach ciahnucca na kiłamietry — mnohija sprabujuć uciačy ŭ napramku Kaśpijskaha mora.

Kamientary da artykuła