Raspracoŭščyk hulni «Śviet tankaŭ» aficyjna pierajšoŭ va ŭłasnaść rasijskaj dziaržavy

Hrupa kampanij «Lesta», jakaja zajmajecca raspracoŭkaj papularnaj hulni «Mir tankaŭ», aficyjna pierajšła va ŭłasnaść rasijskaj dziaržavy. Ciapier joj rasparadžajecca Fiederalnaje ahienctva pa kiravańni dziaržaŭnaj majomaściu.

Ilustracyja: «Lesta hulni» / lesta.games

U Rasii «Lesta» ŭklučaje try kampanii: «Lesta», «Lesta Hiejms Edžensi» i «Lesta Hiejms Maskva». 11 červienia 2025 hoda 100% akcyj hałoŭnaj kampanii «Lesta» byli pieradadzienyja Fiederalnamu ahienctvu pa kiravańni dziaržaŭnaj majomaściu. Da hetaha kampanija naležała byłomu top-mieniedžaru Wargaming — Maliku Chatažajevu. Usia hrupa aceńvajecca prykładna ŭ 1,7 miljarda dalaraŭ.

U pačatku červienia rasijskija ŭłady pryznali dziejnaść zasnavalnikaŭ «Lesty» «ekstremisckaj». Heta źviazana z tym, što ŭ kastryčniku 2023 hoda kampanija Wargaming prapanavała hulcam kuplać virtualnyja pradmiety, hrošy ad jakich nibyta išli na padtrymku Uzbrojenych sił Ukrainy. Pa rašeńni maskoŭskaha suda, usie aktyvy, źviazanyja z hulniami «Śviet tankaŭ», «Śviet karabloŭ» i Tanks Blitz, pavinny byli pierajści dziaržavie.

Wargaming — heta kampanija, zasnavanaja ŭ Biełarusi ŭ 1998 hodzie. Jana raspracavała hulni World of Tanks i World of Warships. Da lipienia 2022 hoda centr raspracovak u Biełarusi (kampanija «Hiejm Strym») naležaŭ centralnamu ofisu Wargaming na Kipry i jašče dvum drobnym akcyjanieram. U krasaviku 2022 hoda Wargaming zajaviła, što sychodzić z Rasii i Biełarusi. Uvieś hulniavy biznes u hetych krainach byŭ pieradadzieny kampanii Lesta Games, jakoj kiravaŭ Malik Chatažajeŭ. Tady ž hulni atrymali novyja nazvy — «Śviet tankaŭ» i «Śviet karabloŭ».

Pa stanie na 17 červienia 2025 hoda, adzinym uładalnikam biełaruskaj kampanii «Hiejm Strym» taksama źjaŭlajecca rasijskaja «Lesta», tamu i hety biełaruski aktyŭ ciapier kantralujecca rasijskaj dziaržavaj.

Kamientary da artykuła