Biełarusu, jaki vajuje za Rasiju, dali rasijski pašpart. U Biełarusi jon kasiŭ ad vojska
33-hadovy biełarus Anton Chilko, jaki pachodzić z Rečyckaha rajona, atrymaŭ rasijski pašpart za ŭdzieł u vajnie na baku Rasii suprać Ukrainy, piša «Biełsat».
Pavodle infarmacyi rasijskich ŚMI, Chilko spačatku dapamahaŭ rasijskim vajskoŭcam jak vałancior — vaziŭ humanitarnuju dapamohu na front, za što atrymaŭ padziaki ad vajskovych kamandziraŭ i kiraŭnictva Čuvašyi. Uviesnu 2025 hoda jon padpisaŭ kantrakt ź Ministerstvam abarony Rasii i pačaŭ słužyć u vojsku.
Pry hetym u minułym u Biełarusi Chilko dvojčy sudzili za ŭchileńnie ad vajskovaj słužby. U 2011 hodzie jon atrymaŭ spačatku štraf, a potym paŭtara hoda «chimii» — abmiežavańnia voli biez nakiravańnia ŭ turmu. U 2013 hodzie jon napisaŭ u sacsietcy «Adnakłaśniki»: «Chutka etap!!!», što moža śviedčyć pra nakiravańnie na adbyćcio pakarańnia.
Z 2015 hoda Anton žyŭ u rasijskich Čebaksarach (stalica Čuvašyi) razam ź siamjoj, ale rasijskaje hramadzianstva atrymaŭ tolki ciapier — jak uznaharodu za padtrymku rasijskaj armii. Darečy, jaho žonka i dzieci ŭsio jašče zastajucca hramadzianami Biełarusi.
Pavodle biełaruskich i rasijskich ŚMI, u Rasii Antona Chilko taksama šukali sudovyja prystavy praz zapazyčanaści. Adnak ci adbyvaŭ jon za heta pakarańnie, nie ŭdakładniajecca.
Chilko — adzin z prynamsi 71 biełarusa, jaki, pavodle padlikaŭ, moh dałučycca da rasijskaj armii jak zamiežny najmit. Usiaho ŭ Maskvie z krasavika 2023 pa travień 2024 hoda na vajnu z Ukrainaj było zavierbavana bolš za 1500 zamiežnikaŭ.
Čytajcie taksama:
Stała viadoma jašče pra adnaho biełarusa, jaki vajavaŭ na baku Rasii i trapiŭ u pałon
U bajach na Danbasie va ŭkrainski pałon trapiŭ 54-hadovy biełarus Siarhiej
Na vajnie va Ukrainie źnik jašče adzin biełarus, jaki vajavaŭ na baku Rasii