Шаман год збіраўся ў тур па Беларусі — цяпер канцэрты адмянілі без тлумачэнняў
У снежні 2025‑га расійскі спявак Шаман мусіў наведаць беларускія абласныя цэнтры, але выступы чамусьці перанеслі на год. Цяпер стала вядома, што тыя канцэрты ўвогуле не адбудуцца.
Фота: theins.ru
У канцы 2025‑га Шаман збіраўся зладзіць тур па Беларусі. Усё пачалося з канцэрта ў мінскім Палацы Рэспублікі, які адбыўся 1 лістапада 2025-га. Поспех атрымаўся сумнеўны: на канцэрт прадалі 80% квіткоў, але з падключэннем адміністрацыйнага рэсурсу.
Па сацсетках разляталіся каментарыі, што прафсаюзы настойліва прапаноўвалі квіткі бюджэтнікам з істотнымі зніжкамі. Таксама пусцілі разнарадку па райвыканкамах, каб тыя выкупалі квіткі.
Пасля Мінска Шаман мусіў паехаць у Брэст, Гродна і Гомель, але ж тыя канцэрты перанеслі без тлумачэння прычын. Цяпер выступы планаваліся на самы канец года — 20, 21 і 23 снежня.
Але днямі з’явілася інфармацыя, што і гэтыя канцэрты не адбудуцца, і Ticketpro ужо прапануе тым, хто набыў квіткі, вярнуць грошы. У тэлеграм-канале і інстаграме Шамана ніякага тлумачэння адмены няма. Аднак мяркуючы па тым, як прадаваліся квіткі ў мінулым годзе, можна выказаць здагадку, што на канцэрт Шамана, вядомага песняй «Я рускі», проста не хочуць ісці.