У Сіднэі ўзвялі самы высокі ў свеце драўляны хмарачос

У аўстралійскім Сіднэі завершана ўзвядзенне каркаса хмарачоса Atlassian Central, які стаў самым высокім у свеце будынкам з выкарыстаннем драўляных канструкцый. Вышыня вежы дасягнула 180 метраў, што больш чым удвая перавышае рэкорд папярэдняга лідара — будынка Ascent у амерыканскім Мілуокі, вышыня якога складае 86,6 метра, паведамляе выданне New Atlas.

Фота: Courtesy of Dexus

Праект распрацавалі архітэктурныя бюро SHoP Architects і BVN Architecture. Новы хмарачос узводзіцца ў новым дзелавым раёне Сіднэя.

Будынак мае гібрыдную канструкцыю: жалезабетоннае ядро, сталёвы вонкавы каркас і каля 10 тысяч кубічных метраў інжынернай драўніны. Асноўнымі матэрыяламі сталі клееныя драўляныя калоны і шматслойныя панэлі з крыжавым размяшчэннем слаёў драўніны.

Фота: Courtesy of Dexus

Менавіта такая камбінацыя сёння лічыцца найбольш эфектыўнай для будаўніцтва высокіх драўляных будынкаў. Яна забяспечвае неабходную трываласць, дазваляе паскорыць мантаж дзякуючы выкарыстанню гатовых элементаў і памяншае вугляродны след у параўнанні са звычайнымі офіснымі хмарачосамі.

Паводле распрацоўшчыкаў, выкарыстанне гэтай тэхналогіі павінна знізіць аб'ём выкідаў, звязаных з будаўніцтвам, прыкладна на 50 працэнтаў. Акрамя таго, будынак будзе прыкладна ўдвая больш энергаэфектыўным у эксплуатацыі, чым традыцыйныя офісныя вежы.

Унутры хмарачоса размесцяцца 39 паверхаў. Асноўную плошчу зоймуць офісы кампаніі Atlassian. Таксама прадугледжаны чатырохпавярховы цэнтр для сумеснай працы з натуральным асвятленнем і вентыляцыяй, хостэл, некалькі зялёных тэрас і сад на даху.

Фота: Courtesy of Dexus

Асаблівасцю праекта стане і захаванне гістарычнага будынка, які ўжо знаходзіўся на гэтым месцы. Яго адрэстаўруюць і ўключаць у галоўнае фае новага комплексу.

Пасля завяршэння асноўнага каркаса будаўнікі працягваюць мантаж фасада, у які будуць інтэграваныя сонечныя панэлі і аўтаматызаваная сістэма астуджэння. Завяршыць будаўніцтва плануюць да канца года.

Каментары да артыкула