Беларусь — адна з самых халодных краін у свеце

Беларусь уваходзіць у лік самых халодных краін свету па сярэднегадавой тэмпературы. Па даных Сусветнага банка і Climatic Research Unit за 1991‑2020 гады, сярэдняя тэмпература ў краіне складае 7,45°C, піша Thinktanks.pro.

Здымак ілюстрацыйны. Фота: «Метеовайб»

У глабальным рэйтынгу Беларусь займае 212 месца з 234 краін і тэрыторый, што робіць яе адной з самых халодных не толькі ў Еўропе, але і ў свеце ў цэлым.

Краіны — нашы суседкі размясціліся ў рэйтынгу наступным чынам:

• Украіна — 201 месца (9,27°C);
• Польшча — 206 месца (8,78°C);
• Літва — 214 месца (7,38°C);
• Латвія — 217 месца (6,87°C);
• Расія — 231 месца (-3,79°C)

Самай гарачай краінай у свеце з'яўляецца Буркіна-Фасо з сярэдняй тэмпературай 30,40°C. У першай пяцёрцы таксама Малі (29,21°C), Аруба (29,17°C), Сенегал (28,90°C) і Маўрытанія (28,82°C). Большасць самых гарачых краін сканцэнтраваныя ў Афрыцы, а таксама ў іншых трапічных рэгіёнах і на Блізкім Усходзе.

Самыя халодныя краіны свету размешчаныя ў паўночных шыротах. Самай халоднай краінай з'яўляецца Грэнландыя з тэмпературай -18,7°C, за ёй ідуць арктычныя тэрыторыі Нарвегіі (-6,78°C) і Канада (-4,03).

Каментары да артыкула