Юлія Міцкевіч: Мае словы пра турму вырвалі з кантэксту. Супраць мяне арганізавалі кампанію цкавання
«Турма нікога не робіць лепшым, толькі горшым», — так Юлія Міцкевіч, намесніца прадстаўніцы па сацыяльнай палітыцы Аб’яднанага пераходнага кабінета, пракаментавала скандал вакол паводзінаў Сяргея Ціханоўскага ў Нью-Ёрку. Многіх, у тым ліку былых палітвязняў, гэтае выказванне абразіла. Юлія Міцкевіч патлумачыла свае словы «Нашай Ніве».
Юлія Міцкевіч. Фота: femantiwar.org
На думку Юліі, яе словы былі вырваныя з кантэксту — маўляў, калі паглядзець усё інтэрв’ю, а не чытаць цытаты адтуль, можа скласціся іншае ўражанне.
Пасля таго, як тыя словы разышліся па інтэрнэце, да Міцкевіч у сацсетках звярталіся былыя палітвязні. Жанчына кажа, што яна выбачылася перад імі за свае словы і гатова выбачыцца публічна:
«Прашу прабачэння, калі мае словы кагосьці пакрыўдзілі, зачапілі ці абразілі. У мяне дакладна не было такой мэты. І мне вельмі шкада, калі яны прагучалі як аб’ектывацыя ці стыгматызацыя палітвязняў як сацыяльна ўразлівай групы. Абсалютна дакладна ў мяне таксама не было такой мэты.
Гэта было абмеркаванне сітуацыі з Сяргеем Ціханоўскім у Нью-Ёрку. Калі я сказала фразу, што турма нікога не робіць лепшым, а толькі горшым, я мела на ўвазе псіхалагічны і эмацыйны стан чалавека, які нядаўна выйшаў з-за кратаў. Пасля столькіх гадоў у жахлівых умовах, у тым ліку катаванняў, як і ўсе палітвязні, ён праходзіць праз вельмі траўматычны досвед. І гэты досвед можа ўплываць на паводзіны — не заўсёды і не ва ўсіх, але можа».
Да таго, што яе словы выклікалі шмат абмеркаванняў, Юлія ставіцца спакойна — людзі маюць права выказвацца.
Але Міцкевіч лічыць, што супраць яе арганізаваная кампанія цкавання:
«Пэўныя людзі, дакладней адзін чалавек, які вядзе супраць мяне кампанію цкавання, скарыстаў гэтую сітуацыю, каб працягнуць і ўзмацніць нападкі. Яна распаўсюджвае шмат хлусні, булінгу, харасменту. Цяпер я таксама знаходжуся пад вялікім ціскам, падобна да маёй каляжанкі Насты Базар, толькі ў іншым кейсе. Гэтая хваля выкарыстоўваецца, маштабіруецца, пра мяне пішуць у розных чатах, дадаючы зусім лжывую інфармацыю, якая нават не датычыцца згаданай сітуацыі. Гэта ўсё ўзмацняецца.
Асабліва цяжка, калі я цяпер працую ў якасці ментаркі і каардыную з боку АПК жаночую лідарскую праграму для беларускіх актывістак, а таксама займаюся іншымі працоўнымі напрамкамі. У тым ліку я працую з тэмай палітвязняў і маю знаёмых і сяброў сярод іх, асабліва жанчын, якія дзеляцца сваім траўматычным досведам. Таму я вельмі адчувальна і з эмпатыяй стаўлюся да гэтай тэмы. Акрамя таго, мая праца ў Кабінеце звязаная з падтрымкай уразлівых груп, і гэта мой асобны кірунак дзейнасці».
Паводле слоў Юліі, гаворка пра Яўгенію Доўгую, журналістку і заснавальніцу праваабарончай ініцыятывы «Палітвязынка». Міцкевіч кажа, што кампанія цкавання з боку Доўгай у яе адрас пачалася яшчэ тады, калі Юлія трапіла на сваю пасаду ў АПК:
«Я не ведаю, з чым гэта звязана і чаму яна так робіць. Доўгі час я маўчала, але цяпер гэтая сітуацыя ўжо мае вельмі цяжкія наступствы для майго псіхічнага здароўя і эмацыйнага стану, бо я таксама маю пэўныя дыягназы і я таксама чалавек».
«Увогуле не разумею, пра што гаворка», — пракаментавала сітуацыю Яўгенія Доўгая.