Расійскія войскі ўпершыню зайшлі на тэрыторыю Днепрапятроўскай вобласці
Аналітычны праект DeepState паведаміў, што расійскія войскі нібыта акупавалі сёлы Запарожскае і Новае Георгіеўка ў Сінельнікаўскім раёне Днепрапятроўскай вобласці. Гэтыя звесткі былі апублікаваныя ў іхнім тэлеграм-канале.
Сёлы Запарожскае і Новагеоргіеўка на карце DeepState. Фота: DeepState
Прэс-сакратар аператыўна-стратэгічнай вайсковай групоўкі «Дняпро» Віктар Трэгубаў пацвердзіў выданню «Суспільне», што расіяне сапраўды спрабуюць замацавацца ў гэтым раёне, а ўкраінскія вайскоўцы змагаюцца за ўтрыманне пазіцый.
Аднак, паводле абноўленай інфармацыі ў тэлеграм-канале АСВГ «Дняпро», Сілы абароны Украіны спынілі прасоўванне расійскіх войскаў і працягваюць кантраляваць сяло Запарожскае. У Новай Георгіеўцы ідуць актыўныя баі, дзе ўкраінскія вайскоўцы, як паведамляецца, наносяць значныя страты ворагу.
Такім чынам, сцвярджэнні пра поўную акупацыю абодвух сёлаў не адпавядаюць рэчаіснасці, падкрэслілі ў групоўцы. Гэтыя звесткі таксама абверглі ў Генштабе.
Напярэдадні, 25 жніўня, Мінабароны Расіі ўжо заяўляла пра заняцце Запарожскага, але ва Украіне гэту інфармацыю абверглі.
Як падкрэсліў кіраўнік украінскага Цэнтра супрацьдзеяння дэзынфармацыі Андрэй Каваленка, баявыя дзеянні ідуць каля адміністрацыйнай мяжы Днепрапятроўскай вобласці і расійскія войскі нават выкарыстоўваюць FPV-дроны, але прарыву няма. Сілы абароны працягваюць трымаць пазіцыі ў «шэрай» зоне, не даючы ворагу замацавацца на іх.
Чытайце таксама:
Ваенкар заявіў, што расіяне пад Дабраполлем апынуліся ў мяшку
Расійскія вайскоўцы пад Дабраполлем цяпер самі апынуліся пад пагрозай акружэння