Rasijskija vojski ŭpieršyniu zajšli na terytoryju Dnieprapiatroŭskaj vobłaści
Analityčny prajekt DeepState paviedamiŭ, što rasijskija vojski nibyta akupavali sioły Zaparožskaje i Novaje Hieorhijeŭka ŭ Sinielnikaŭskim rajonie Dnieprapiatroŭskaj vobłaści. Hetyja źviestki byli apublikavanyja ŭ ichnim telehram-kanale.
Sioły Zaparožskaje i Novahieorhijeŭka na karcie DeepState. Fota: DeepState
Pres-sakratar apieratyŭna-stratehičnaj vajskovaj hrupoŭki «Dniapro» Viktar Trehubaŭ paćvierdziŭ vydańniu «Suśpilnie», što rasijanie sapraŭdy sprabujuć zamacavacca ŭ hetym rajonie, a ŭkrainskija vajskoŭcy zmahajucca za ŭtrymańnie pazicyj.
Adnak, pavodle abnoŭlenaj infarmacyi ŭ telehram-kanale ASVH «Dniapro», Siły abarony Ukrainy spynili prasoŭvańnie rasijskich vojskaŭ i praciahvajuć kantralavać siało Zaparožskaje. U Novaj Hieorhijeŭcy iduć aktyŭnyja bai, dzie ŭkrainskija vajskoŭcy, jak paviedamlajecca, nanosiać značnyja straty vorahu.
Takim čynam, śćviardžeńni pra poŭnuju akupacyju abodvuch siołaŭ nie adpaviadajuć rečaisnaści, padkreślili ŭ hrupoŭcy. Hetyja źviestki taksama abvierhli ŭ Hienštabie.
Napiaredadni, 25 žniŭnia, Minabarony Rasii ŭžo zajaŭlała pra zaniaćcie Zaparožskaha, ale va Ukrainie hetu infarmacyju abvierhli.
Jak padkreśliŭ kiraŭnik ukrainskaha Centra supraćdziejańnia dezynfarmacyi Andrej Kavalenka, bajavyja dziejańni iduć kala administracyjnaj miažy Dnieprapiatroŭskaj vobłaści i rasijskija vojski navat vykarystoŭvajuć FPV-drony, ale praryvu niama. Siły abarony praciahvajuć trymać pazicyi ŭ «šeraj» zonie, nie dajučy vorahu zamacavacca na ich.
Čytajcie taksama:
Vajenkar zajaviŭ, što rasijanie pad Dabrapollem apynulisia ŭ miašku
Rasijskija vajskoŭcy pad Dabrapollem ciapier sami apynulisia pad pahrozaj akružeńnia