Украіна ўвяла санкцыі супраць Дзмітрыя Шаўцова
Украіна ўвяла доўгатэрміновыя санкцыі супраць кіраўніка Беларускага Чырвонага Крыжа Дзмітрыя Шаўцова. Яго абвінавачваюць у датычнасці да незаконнага вывазу ўкраінскіх дзяцей з тэрыторый, акупаваных Расіяй.
Дзмітрый Шаўцоў
Прэзідэнт Украіны Уладзімір Зяленскі падпісаў указ, які ўводзіць санкцыі на 50 гадоў. Абмежаванні прадугледжваюць, сярод іншага, замарозку актываў, забарону эканамічнай дзейнасці ва Украіне, спыненне транзіту, палётаў і перамяшчэння тавараў, а таксама адмену ліцэнзій і іншых дазволаў.
Разам з Шаўцовым у санкцыйны спіс увайшлі яшчэ 46 чалавек, якія падтрымалі расійскі бок у вайне з Украінай.
Дзьмітрый Шаўцоў стаў фігурантам скандалу ў 2023 годзе, калі наведаў акупаваны Данбас у вопратцы з сімволікай Z і перадаў туды гуманітарную дапамогу. Ён адкрыта прызнаўся, што арганізацыя ўдзельнічае ў вывазе дзяцей з Украіны.
Міжнародны Чырвоны Крыж адхрысціўся ад яго дзеянняў, выказаў заклапочанасць і пазней прыпыніў сяброўства беларускай арганізацыі ў сваёй сетцы. У 2024 годзе Шаўцоў таксама трапіў пад санкцыі Еўрасаюза.