Krasulin: Ludzi ŭ biełaruskich turmach nie tak ryzykujuć, jak ukraincy, u jakich laciać rakiety
«Usio ž u turmach nie 100%-aja śmiarotnaść».
Jaŭhien Krasulin. Skryn videa: belsat_life / YouTube
Palityčny analityk, kandydat histaryčnych navuk Jaŭhien Krasulin u efiry «Biełsata» raskrytykavaŭ adkryty list byłych palitviaźniaŭ da jeŭrapiejskich palitykaŭ. Pavodle jaho, dakumient pabudavany na emacyjnym zvarocie da aŭdytoryi.
«Tam vielmi šmat manipulacyj u hetym liście. U tym liku vystaŭleńnie, što žyćcio — najvyšejšaja kaštoŭnaść, a značyć, ludziej treba vyciahvać z turmaŭ. Ale ŭsio ž taki ŭ turmach nie 100%-aja śmiarotnaść», — skazaŭ jon.
«Ludzi, jakija tam znachodziacca, nie tak ryzykujuć, jak tyja ž ukraincy ciapier, u jakich laciać rakiety, drony, snarady, jakija ŭ tym liku dapamahaje rabić łukašenkaŭski režym Biełarusi», — dadaŭ analityk.
Metu lista Krasulin bačyć u tym, kab pačać pieramovy z režymam.
«Pryčym tam ža adciskajucca demakratyčnyja siły. Jany pierastajuć być subjektam. Biełarusy pierastajuć być subjektam. Subjekty — heta režym Łukašenki i jeŭrapiejskija palityki», — ličyć jon.
Nazyvać taki padychod novym, na dumku Krasulina, niama padstaŭ. «Nasamreč heta vielmi staraja stratehija», — zapeŭnivaje historyk i nahadvaje dźvie libieralizacyi — napiaredadni vybaraŭ 2010 hoda, a taksama vyzvaleńnie palitviaźniaŭ i źniaćcie sankcyj u siaredzinie 2010-ch.
«Kožny vitok stratehii pryvodzić da novaha vitku represij na bolš vysokim uzroŭni. Bo režymu nie treba ni libieralizacyja, ni vyzvaleńnie ludziej. Represii — heta strach, heta słup, na jakim staić aŭtarytaryzm», — davodzić Krasulin.