U Rečyckim rajonie brakańjery nackoŭvali palaŭničych sabak na biezabaronnaje łasiania VIDEA

U Rečyckim rajonie zatrymali hrupu mužčyn, jakich padazrajuć u niezakonnym palavańni i žorstkim pieraśledzie łasianiaci. Parušalnikaŭ vyjavili padčas sumiesnaha rejdu Homielskaj abłasnoj inśpiekcyi achovy žyviolnaha i raślinnaha śvietu i supracoŭnikaŭ Rečyckaha lashasa, jakija praviarali apieratyŭnuju infarmacyju.

Skrynšot ź videa

Padčas pravierki supracoŭniki lashasa kala adnaho z paloŭ zaŭvažyli mužčyn, jakija jechali na aŭtamabili i nackoŭvali na łasiania, jakomu jašče nie spoŭniłasia i hoda, svaich palaŭničych sabak. Pavodle śviedčańnia inśpiektaraŭ, małoje brakańjery siłaj adbili ad maci. Što stałasia z łasichaj, pakul vyśviatlajecca. Nie vyklučana, što jana taksama stała achviaraj niezakonnaha palavańnia.

Na videazapisie ź miesca zdareńnia vidać, jak źniasilenaje i napałochanaje łasiania, ratujučysia ad sabak, pryciskajecca da kuzava słužbovaha aŭtamabila supracoŭnikaŭ lashasa.

Na miesca prybyli supracoŭniki Homielskaj abłasnoj inśpiekcyi. U chodzie raźbiralnictva vyśvietliłasia, što va ŭsioj kampanii tolki adzin čałaviek mieŭ zakonny status palaŭničaha.

U dačynieńni da zatrymanaha raspačali dva administracyjnyja pracesy. Pieršy — pavodle častki 1 artykuła 16.27 Kodeksa ab administracyjnych pravaparušeńniach Biełarusi za hrubaje parušeńnie praviłaŭ palavańnia. Druhi — pavodle častki 9 taho ž artykuła za znachodžańnie ŭ palaŭničych uhodździach i palavańnie biez dakumientaŭ, praduhledžanych zakanadaŭstvam.

Akramia taho, materyjały pa fakcie hrubaha parušeńnia praviłaŭ uliku, zachoŭvańnia i vykarystańnia ahniastrelnaj zbroi pavodle artykuła 24.30 KaAP pieradali ŭ Rečycki rajonny adździeł unutranych spraŭ.

U inśpiekcyi adznačyli, što zatrymańnie stała mahčymym dziakujučy supracoŭnictvu dvuch viedamstvaŭ u miežach śpiecyjalnaha kompleksnaha mierapryjemstva «Palavańnie». Apieratyŭnaja praca inśpiektaraŭ i viedańnie miascovaści supracoŭnikami lashasa dapamahli vyjavić parušalnikaŭ.

Kamientary da artykuła