Ułady anansavali źmieny ŭ padatkovych staŭkach na nastupny hod. Što pamianiajecca?

Z 2027 hoda ŭ Biełarusi źbirajucca pavialičyć padatki i zbory. Na Nacyjanalnym pravavym internet-partale apublikavali prajekt źmianieńniaŭ u Padatkovy kodeks, jaki praduhledžvaje indeksacyju stavak padatkaŭ i asobnych fiksavanych sum. Źmieny zakranuć jak fizičnych asob, tak i arhanizacyi dy indyvidualnych pradprymalnikaŭ, piša vydańnie Mogilev.in.

Zdymak ilustracyjny. Fota: pixabay.com

U pryvatnaści, prapanujecca pavialičyć minimalny padatak na prafiesijny dachod, transpartny padatak, padatak na pieršuju kvateru i padatak na nieruchomaść.

Padatak za zdaču žylla ŭ arendu ŭ Minsku prapanujuć pavialičyć z 53 da 56 rubloŭ za kožny žyły pakoj u kvatery. U abłasnych centrach jon vyraście z 49 da 52 rubloŭ, u bujnych haradach — z 33 da 35 rubloŭ, a ŭ astatnich nasielenych punktach — z 20 da 21 rubla.

Zbor za ŭtrymańnie sabak moža pavialičycca z 14 da 15 rubloŭ za kvartał. Dla sabak parod sa śpiecyjalnaha pieraliku staŭka vyraście z 67 da 71 rubla za kvartał.

Taksama prapanujecca pavialičyć transpartny padatak dla ŭładalnikaŭ lehkavych aŭtamabilaŭ. Dla fizičnych asob staŭka za mašynu masaj da 1,5 tony vyraście z 75 da 80 rubloŭ u hod. Za aŭtamabil masaj bolš za 1,5, ale nie bolš za 1,75 tony padatak pavialičycca z 99 da 105 rubloŭ, a za mašynu masaj bolš za 1,75, ale nie bolš za 2 tony, — sa 124 da 132 rubloŭ.

Źmieny zakranuć taksama transpart, jaki naležyć arhanizacyjam i indyvidualnym pradprymalnikam. Naprykład, za lehkavy aŭtamabil masaj da adnoj tony prapanujecca płacić 208 rubloŭ zamiest 196. Za mašynu masaj ad 2 da 3 ton staŭka vyraście z 309 da 328 rubloŭ, a za aŭtamabil ciažejšy za 3 tony — z 393 da 417 rubloŭ.

Dla hruzavikoŭ masaj da 2,5 tony prapanujuć pavialičyć padatak z 337 da 358 rubloŭ. Za aŭtobus umiaščalnaściu bolš za 40 pasažyraŭ arhanizacyi buduć płacić 655 rubloŭ zamiest 617.

Pavyšeńnie zakranie i aŭtamabili pavyšanaj kamfortnaści, dla jakich praduhledžanaja dziesiacirazovaja staŭka transpartnaha padatku, a taksama asobnyja katehoryi matacykłaŭ, na jakija raspaŭsiudžvajecca piacirazovaja staŭka.

Pakul novyja sumy nie zaćvierdžanyja. Jany ŭtrymlivajucca ŭ prajekcie papravak da Padatkovaha kodeksa na 2027 hod i mohuć źmianicca da pryniaćcia dakumienta.

Kamientary da artykuła