Vyjšła novaja kniha Maksima Znaka «Kałanisty»
Pra vychad novaj knihi byłoha palitźniavolenaha advakata Maksima Znaka paviedamiła ŭ fejsbuku kiraŭnica Biełaruskaha PENa Taćciana Niadbaj.
«Kałanisty» — praciah knihi Maksima Znaka «Zekamieron» i novy zbor karotkich historyj sa śvietu źniavoleńnia. Kali dziejańnie pieršaj knihi adbyvałasia pieravažna ŭ SIZA, to hieroi «Kałanistaŭ» traplajuć užo ŭ prastoru papraŭčaj kałonii — śviet sa svaimi zakonami, rytuałami, ijerarchijami, absurdam i asablivaj movaj.
Hetyja facecyi — śmiešnyja, horkija, časam amal niejmaviernyja epizody turemnaha žyćcia, u jakich isnujuć pobač žorstkaść i spahada, strach i humar, prynižeńnie i čałaviečaja hodnaść. Znak uvažliva pryhladajecca da ludziej pa abodva baki turemnaj sistemy i pakazvaje jaje nie tolki jak miechanizm pakarańnia, ale i jak asobny śviet, dzie absurd pastupova robicca normaj, a čałaviek vučycca žyć u nienarmalnych abstavinach.
Epihraf da knihi ŭziaty z «Tajamničaha vostrava» Žula Vierna: jaje hieroi admaŭlajucca ličyć siabie paciarpiełymi krušeńnie i nazyvajuć siabie kałanistami. U papraŭčaj kałonii čaściej možna nazirać apatyju i daŭnšyftynh, ale byvajuć i vyklučeńni — čałaviek sprabuje nie prosta vyžyć na naviazanym jamu «vostravie», ale i zachavać zdolnaść dumać, śmiajacca, zaŭvažać inšych i zastavacca saboj. I tamu kniha padkazvaje, jak u samych zmročnych miescach možna znajści śviatło.
Čytajcie taksama:
Maksim Znak: Usia kraina — heta vialikaja kałonija
«Padziemnyja pierachody» Bachareviča — raman, jaki zdymaje z kručka sumnievu