Stała viadoma, jakoj krainie pieradavaŭ infarmacyju były kiraŭnik niamieckaj raźviedki

Aŭhust Chaninh, były kiraŭnik Fiederalnaj raźviedvalnaj słužby Hiermanii, jakoha nazyvajuć adnym ź fihurantaŭ najhučniejšaha špijonskaha skandału ŭ Jeŭropie XXI stahodździa, 6 kastryčnika byŭ zatrymany pa padazreńni ŭ supracoŭnictvie z zamiežnymi śpiecsłužbami i dziaržaŭnaj zdradzie. Jak paviedamlaje časopis Der Spiegel, Chaninh pieradavaŭ analityčnyja materyjały, padrychtavanyja na asnovie sakretnaj raźviedvalnaj infarmacyi, u Azierbajdžan.

Aŭhust Chaninh

Viadoma, što Aŭhust Chaninh uvachodziŭ u kiraŭnictva hramadskaj arhanizacyi i łabisckaha abjadnańnia «Niamiecka-azierbajdžanski forum», jakoje zajmajecca prasoŭvańniem dvuchbakovych prajektaŭ i, jak śćviardžajecca ŭ publikacyi, słužyć adnym ź instrumientaŭ upłyvu Baku na niamieckuju palityku.

Chaninh uznačalvaŭ Fiederalnuju raźviedvalnuju słužbu Hiermanii z 1998 pa 2005 hod. Paśla sychodu ź dziaržaŭnaj słužby ŭ 2010 hodzie jon hałoŭnym čynam zajmaŭsia kansultavańniem pa pytańniach palityki i biaśpieki.

Śledstva miarkuje, što z dapamohaj svajho byłoha padnačalenaha Manfreda D., jaki praciahvaŭ pracavać u słužbie da 2022 hoda, Chaninh atrymaŭ dostup da prykładna 2000 sakretnych raźviedvalnych dakumientaŭ. Siarod ich byli, u pryvatnaści, štotydniovyja spravazdačy, jakija tyčylisia roznych mižnarodnych pytańniaŭ, u tym liku situacyi ŭ Rasii, dzie niamieckaja raźviedka tradycyjna maje važnyja krynicy infarmacyi.

Kamientary da artykuła