Padčas vybuchu na abaronnym chimzavodzie ŭ Padmaskoŭi zahinuli jak minimum siem čałaviek

Rasijskija čynoŭniki i prapahandysty śćviardžajuć, što pryčynaj zdareńnia stała nie ataka ŭkrainskich bieśpiłotnikaŭ, a techničnaja avaryja.

Zavod uvachodzić u skład rasijskaj dziaržkarparacyi «Rastech» i siarod inšaha zajmajecca vytvorčaściu pradukcyi vajskovaha pryznačeńnia.

Pradpryjemstva vypuskaje patrony dla hładkastvolnych strelbaŭ kalibraŭ 12, 16, 20 i 410, a taksama sihnalnyja i aśviatlalnyja srodki, srodki abarony latalnych aparataŭ i antyterarystyčnyja srodki, jakija vyrablajucca pavodle dziaržaŭnych zakazaŭ dla rasijskich siłavych struktur. Akramia taho, pa infarmacyi «Ukrainskaj praŭdy», na zavodzie vyrablajucca termabaryčnyja bajavyja častki dla bieśpiłotnikaŭ typu «Šachied».

Pradpryjemstva znachodzicca prykładna za 100 kiłamietraŭ ad Istry, dzie ŭ hety momant na plenarnym pasiadžeńni dyskusijnaha kłuba «Vałdaj» vystupaŭ prezident Rasii Uładzimir Pucin.

Pieršyja paviedamleńni pra vybuch pačali źjaŭlacca paśla 18:30. Kala 20:30 u rajonie zavoda znoŭ byli čuvać vybuchi, paviedamlaŭ MSK1.RU sa spasyłkaj na miascovych žycharoŭ.

Kiraŭnik horada Sierhijeŭ Pasad Alaksiej Łužecki zajaviŭ, što vybuch nie byŭ źviazany z atakaj bieśpiłotnikaŭ. TASS sa spasyłkaj na apieratyŭnyja słužby taksama paviedamiła, što pryčynaj pažaru stała technahiennaja avaryja.

Pavodle infarmacyi telehram-kanała Shot, vybuch adbyŭsia ŭ cechu №4, jaki całkam razburyŭsia. U momant zdareńnia ŭ budynku znachodzilisia 44 čałavieki. 40 ź ich evakujavali. Pavodle ahienctva «RIA Novosti», jašče čatyry čałavieki mahli zastavacca pad zavałami.

U 2025 hodzie hety zavod dvojčy atakavali ŭkrainskija bieśpiłotniki — u studzieni i lipieni. Pra paciarpiełych u vyniku hetych atak nie paviedamlałasia.

Kali infarmacyja pra siem zahinułych paćvierdzicca, hety vybuch moža stać adnym z najbolš śmiarotnych na pradpryjemstvach Maskoŭskaha rehijona za apošnija hady. U žniŭni 2023 hoda na terytoryi Zahorskaha optyka-miechaničnaha zavoda ŭ Sierhijevym Pasadzie adbyŭsia vybuch, u vyniku jakoha zahinuli dzieviać čałaviek i bolš za 100 atrymali traŭmy.

Kamientary da artykuła