U Navapołacku buduć sudzić mužčynu, jaki padčas sartavańnia śmiećcia znajšoŭ stary revalvier

U Navapołacku prakuratura nakiravała ŭ sud kryminalnuju spravu suprać miascovaha žychara, jakoha abvinavačvajuć u niezakonnym nabyćci, zachoŭvańni, pieravozcy i našeńni ahniastrelnaj zbroi i bojeprypasaŭ, paviedamlaje prakuratura Viciebskaj vobłaści.

Fota ilustracyjnaje

Letam 2026 hoda mužčyna pracavaŭ na sartavańni bytavych adkidaŭ. Na sartavalnaj stužcy siarod śmiećcia jon znajšoŭ zaradžany revalvier sistemy Nahana-Śmirnskaha z tryma patronami. Zamiest taho kab paviedamić pra znachodku kiraŭnictvu i zdać zbroju va ŭstanoŭlenym paradku, mužčyna tajemna zabraŭ jaje dadomu i zachoŭvaŭ siarod asabistych rečaŭ.

Pra niezakonnaje zachoŭvańnie zbroi stała viadoma vypadkova. Pamiž mužčynam i jaho sužycielkaj adbyŭsia bytavy kanflikt, paśla čaho jon źviarnuŭsia ŭ milicyju z prośbaj dapamahčy vyvieźci svaje rečy ź jaje žylla. Padčas hetaha supracoŭniki milicyi znajšli siarod rečaŭ revalvier. Na miesca vyklikali śledča-apieratyŭnuju hrupu, zbroju kanfiskavali i nakiravali na ekśpiertyzu.

Ekśpiertyza pakazała, što revalvier byŭ vyrableny ŭ 1926 hodzie na Tulskim zbrojevym zavodzie. Pra heta śviedčyć, u tym liku, klajmo z darevalucyjnym pravapisam. Zbroja całkam spraŭnaja i prydatnaja dla stralby. Adzin z troch patronaŭ u barabanie pryznali bajavym.

Mužčyna patłumačyŭ, što nie nadavaŭ asablivaha značeńnia histaryčnaj i pravavoj kaštoŭnaści znachodki i nibyta płanavaŭ zdać revalvier na mietałałom.

Kanfiskavany nahan pryznali kaštoŭnym ekspanatam i ŭklučyli ŭ fond Upraŭleńnia Dziaržaŭnaha kamiteta sudovych ekśpiertyz Viciebskaj vobłaści.

U dačynieńni da abvinavačanaha abranaja miera strymańnia ŭ vyhladzie padpiski ab niavyjeździe i naležnych pavodzinach.

Kamientary da artykuła