У Наваполацку будуць судзіць мужчыну, які падчас сартавання смецця знайшоў стары рэвальвер

У Наваполацку пракуратура накіравала ў суд крымінальную справу супраць мясцовага жыхара, якога абвінавачваюць у незаконным набыцці, захоўванні, перавозцы і нашэнні агнястрэльнай зброі і боепрыпасаў, паведамляе пракуратура Віцебскай вобласці.

Фота ілюстрацыйнае

Летам 2026 года мужчына працаваў на сартаванні бытавых адкідаў. На сартавальнай стужцы сярод смецця ён знайшоў зараджаны рэвальвер сістэмы Нагана-Смірнскага з трыма патронамі. Замест таго каб паведаміць пра знаходку кіраўніцтву і здаць зброю ва ўстаноўленым парадку, мужчына таемна забраў яе дадому і захоўваў сярод асабістых рэчаў.

Пра незаконнае захоўванне зброі стала вядома выпадкова. Паміж мужчынам і яго сужыцелькай адбыўся бытавы канфлікт, пасля чаго ён звярнуўся ў міліцыю з просьбай дапамагчы вывезці свае рэчы з яе жылля. Падчас гэтага супрацоўнікі міліцыі знайшлі сярод рэчаў рэвальвер. На месца выклікалі следча-аператыўную групу, зброю канфіскавалі і накіравалі на экспертызу.

Экспертыза паказала, што рэвальвер быў выраблены ў 1926 годзе на Тульскім зброевым заводзе. Пра гэта сведчыць, у тым ліку, кляймо з дарэвалюцыйным правапісам. Зброя цалкам спраўная і прыдатная для стральбы. Адзін з трох патронаў у барабане прызналі баявым.

Мужчына патлумачыў, што не надаваў асаблівага значэння гістарычнай і прававой каштоўнасці знаходкі і нібыта планаваў здаць рэвальвер на металалом.

Канфіскаваны наган прызналі каштоўным экспанатам і ўключылі ў фонд Упраўлення Дзяржаўнага камітэта судовых экспертыз Віцебскай вобласці.

У дачыненні да абвінавачанага абраная мера стрымання ў выглядзе падпіскі аб нявыездзе і належных паводзінах.

Каментары да артыкула