Pałovie admovili, tracinie dali status biežanca. Stali viadomyja žnivieńskija vyniki razhladaŭ zajaŭ biełarusaŭ na mižnarodnuju abaronu ŭ Polščy

U žniŭni 2026 hoda Polšča pryznała biežancami 35 biełarusaŭ, jakija źviarnulisia pa mižnarodnuju abaronu. Jašče adnamu čałavieku nadali dadatkovuju abaronu. Adnačasova pa 49 zajavach byli vyniesieny admoŭnyja rašeńni, a razhlad jašče 17 spraŭ prypynili. Takija dadzienyja pryvodzić polskaje Upraŭleńnie pa spravach inšaziemcaŭ, piša vydańnie Most.

Ctanoŭčyja rašeńni ŭ žniŭni skłali 35,3% ad ahulnaj kolkaści razhledžanych spraŭ. Heta bolš, čym u lipieni, kali status biežanca abo dadatkovuju abaronu atrymali tolki pa 13% spraŭ. Adnak pakazčyk za žnivień istotna nižejšy za vyniki papiarednich hadoŭ i pieršych piaci miesiacaŭ 2026 hoda, kali dola admovaŭ składała ŭsiaho kala 4,5—5,5%.

Uvohule kolkaść novych zajaŭ biełarusaŭ na mižnarodnuju abaronu ŭ Polščy skaračajecca. Za pieršyja vosiem miesiacaŭ 2026 hoda polskaje viedamstva zarehistravała kala 1200 takich zvarotaŭ. Heta aznačaje viartańnie da adnosna stabilnaha ŭzroŭniu paśla rekordnych pakazčykaŭ 2022—2024 hadoŭ, kali štohod pastupała ad 3 da 4 tysiač zajaŭ. U 2024 hodzie ich było amal 4 tysiačy.

Upraŭleńnie pa spravach inšaziemcaŭ tłumačyć źnižeńnie kolkaści novych zvarotaŭ dźviuma asnoŭnymi pryčynami. Pa-pieršaje, bolšaść ludziej, jakija paśla 2020 hoda sutykalisia z pahrozaj palityčnych represij, užo pakinuli Biełaruś i paśpieli lehalizavać svajo znachodžańnie ŭ Polščy. Pa-druhoje, na rašeńni polskich uładaŭ upłyvaje bolš strohaja praktyka razhladu spraŭ. U viedamstvie miarkujuć, što vysokaja dola admovaŭ letam moža strymlivać novych mihrantaŭ ad vybaru pracedury mižnarodnaj abarony jak asnoŭnaha sposabu lehalizacyi.

Pa stanie na 1 vieraśnia 2026 hoda ŭ Polščy zastavalisia na razhladzie spravy kala 3,2 tysiačy hramadzian Biełarusi. Prykładna 92% ź ich znachodzilisia na razhladzie ŭ pieršaj instancyi. Niahledziačy na źnižeńnie kolkaści novych zajaŭ, zachoŭvajecca čarha sa spraŭ, padadzienych u papiarednija hady. U polskim viedamstvie heta nazyvajuć strukturnaj prablemaj prapusknoj zdolnaści sistemy. Ciapier asnoŭnaja ŭvaha nadajecca spravam, jakija nazapasilisia z 2023—2024 hadoŭ.

Źmianilisia i suadnosiny pamiž statusam biežanca i dadatkovaj abaronaj. Kali ŭ 2022 hodzie na adzin status biežanca prypadała kala 20 rašeńniaŭ ab dadatkovaj abaronie, to ŭ apošnija miesiacy status biežanca biełarusam stali nadavać čaściej. U spravazdačy polskaha viedamstva dakładnaja pryčyna takoj źmieny nie nazyvajecca. Aŭtary materyjału miarkujuć, što ciapier bolš uvahi moža nadavacca indyvidualnym vypadkam pieraśledu, a nie tolki ahulnaj palityčnaj situacyi ŭ Biełarusi i patencyjnaj pahrozie dla zajaŭnika.

Što da dostupu da rynku pracy, to zvyčajna zajaŭniki na mižnarodnuju abaronu mohuć atrymać prava pracavać praz šeść miesiacaŭ paśla padačy zajavy, kali za hety čas pieršaja instancyja nie vyniesła rašeńnia. Adnak biełarusy ŭ hetym płanie časta źjaŭlajucca vyklučeńniem. Mnohija ź ich jašče da pačatku pracedury mižnarodnaj abarony ŭžo mieli prava na pracu — naprykład, na padstavie humanitarnych viz z dazvołam na pracu abo časovych dazvołaŭ na žycharstva.

U polskim viedamstvie adznačajuć, što dziakujučy hetamu bolšaść biełarusaŭ, jakija źviarnulisia pa abaronu, zastajucca finansava niezaležnymi i nie stvarajuć dadatkovaj nahruzki na dziaržaŭnuju sistemu sacyjalnaj dapamohi.

26 vieraśnia biełarusy praviali pikiet kala budynka Upraŭleńnia pa spravach zamiežnikaŭ u znak pratestu suprać vialikaj kolkaści admoŭ u nadańni mižnarodnaj abarony.

Kamientary da artykuła