U Viciebsku na aŭkcyjon vystavili Smalenski rynak

U Viciebsku na aŭkcyjon vystavili znakamity Smalenski rynak, ahulnaja historyja jakoha naličvaje bolš za 160 hadoŭ. Adpaviedny łot źjaviŭsia na staroncy GosTorg, piša Blizko.by.

U skład majomaści ŭvachodziać budynak krytaha charčovaha rynku, inšy budynak rynku, składskija pamiaškańni, hramadski tualet, skład, budynak łabaratoryi vieterynarna-sanitarnaj ekśpiertyzy, ciepłavaja sietka, a taksama 210 adzinak handlovaha i technałahičnaha abstalavańnia.

Rynak raźmieščany na Smalenskaj płoščy ŭ centry Viciebska. Płošča ziamielnaha ŭčastka składaje 1,4225 hiektara. Pačatkovy košt łota — 25 miljonaŭ rubloŭ, što pa aktualnym kursie Nacbanka adpaviadaje prykładna 8,3 miljona dalaraŭ. Aŭkcyjon adbudziecca 29 kastryčnika ŭ 14:00.

Pavodle «Viciebskaj encykłapiedyi», pad nazvaj Smalenski rynak jon pracavaŭ užo ŭ 1860‑ch hadach. Tady rynak znachodziŭsia na płoščy, jakaja ciapier nosić imia Lenina.

U 1921 hodzie staryja rynkavyja pabudovy pačali znosić, paśla čaho rynak pierajechaŭ na ciapierašniuju Smalenskuju płošču. U 1985 hodzie tam pabudavali dvuchpaviarchovy kryty paviljon na 200 handlovych miescaŭ. Jaho płošča składała 1800 kvadratnych mietraŭ, a ahulnaja płošča rynku — kala 10 tysiač kvadratnych mietraŭ.

Kamientary da artykuła