U Kijevie zatrymali rasijskuju ahientku, jakuju pierapravili praź Biełaruś. Jana płanavała palityčnaje zabojstva

Kontrraźviedka SBU praduchiliła zabojstva rasijskaha apazicyjaniera, jaki ciapier uznačalvaje adnu z ahulnaŭkrainskich hramadskich arhanizacyj. U Kijevie zatrymali žančynu, zavierbavanuju rasijskimi śpiecsłužbami, jakaja atrymała zadańnie zastrelić jaho, paviedamlaje pres-słužba SBU.

Pavodle infarmacyi śledstva, zamach płanavałasia ździejśnić kala adnaho sa staličnych spartzałaŭ, dzie hramadski dziejač pracuje trenieram pa kikboksinhu. Kilerka pavinna była ŭčynić napad z zasady, vykarystaŭšy bajavy pistalet.

Zakazany rasijskimi śpiecsłužbami čałaviek z 2022 hoda vajuje na baku Ukrainy — spačatku na Kijeŭščynie, a paźniej na ŭschodzie krainy.

Supracoŭniki SBU zatrymali žančynu niepadalok ad spartkompleksu, kali jana pravodziła dadatkovuju raźviedku miascovaści i vybirała miesca dla budučaha napadu.

Pavodle materyjałaŭ spravy, zadańnie FSB vykonvała biespracoŭnaja žycharka časova akupavanaha Mielitopala. Rasijskija śpiecsłužbisty zavierbavali jaje, paabiacaŭšy zakryć kryminalnuju spravu, źviazanuju ź niezakonnym zachoŭvańniem narkotykaŭ.

Paśla viarboŭki žančyna prajšła padrychtoŭku na bazie miascovaha adździeła FSB. Tam jaje vučyli mieram kanśpiracyi, aryjentavańniu na miascovaści i stralbie z ahniastrelnaj zbroi.

Paśla navučańnia jaje pierapravili ŭ Žytomir tranzitam praz terytoryju Biełarusi, a adtul jana nakiravałasia ŭ Kijeŭ.

U stalicy ahientka niekalki razoŭ mianiała hateli. Vychodziačy z numara, jana pakidała śpiecyjalnuju paznaku na dźviarach, kab zrazumieć, ci zachodziŭ u pamiaškańnie niechta starońni.

Paźniej žančyna atrymała ad rasijskaha kuratara kaardynaty schovanki ŭ lasnoj zonie Kijeva. Tam jana zabrała pistalet z patronami. SBU znajšła zbroju padčas pieratrusu ŭ jaje hatelnym numary.

Taksama ŭ zatrymanaj kanfiskavali smartfon, z dapamohaj jakoha jana padtrymlivała suviaź z kurataram FSB. Jaho asobu, pavodle SBU, užo ŭstanavili.

Śledčyja SBU paviedamili žančynie pra padazreńnie ŭ dziaržaŭnaj zdradzie, učynienaj va ŭmovach vajennaha stanovišča. Jana znachodzicca pad vartaj biez prava ŭnieści zakład. U vypadku pryznańnia vinavataj joj pahražaje pažyćciovaje źniavoleńnie z kanfiskacyjaj majomaści.

U pačatku vieraśnia SBU ŭžo paviedamlała pra praduchileny zamach FSB na pradstaŭnika rasijskaj apazicyi. Ci źviazanyja hetyja vypadki pamiž saboj, pakul nieviadoma.

Kamientary da artykuła