U akijanie stvaryli štučnyja ryfy, i kolkaść vidaŭ ryb uzrasła ŭ piać razoŭ

Uzdoŭž paŭdniova-zachodniaha ŭźbiarežža Zachodniaj Aŭstralii stvaryli dva štučnyja ryfy, paśla čaho kolkaść vidaŭ ryb, jakija ich zasialili, za try hady vyrasła prykładna ŭ piać razoŭ, piša The Times of India.

Zdymak ilustracyjny. Fota: Getty Image

Ryfy ŭstalavali ŭ studzieni 2013 hoda kala haradoŭ Banbiery i Dansbara. Heta byŭ pieršy piłotny prajekt pa stvareńni štučnych ryfaŭ u Zachodniaj Aŭstralii. Jaho metaj było pašyryć asiarodździe pražyvańnia važnych vidaŭ ryb i stvaryć novyja mahčymaści dla amatarskaha rybałoŭstva.

Dla kožnaha ryfa vykarystali pa 30 bietonnych modulaŭ, jakija atrymali nazvu Fish Boxes. Kožny modul mieŭ kala troch mietraŭ u daŭžyniu i važyŭ 10 ton. Jaho kanstrukcyja była raspracavanaja tak, kab stvarać schoviščy dla ryb, spryjać cyrkulacyi vady i farmiravać miescy dla karmleńnia.

Da ŭstalavańnia kanstrukcyj u hetych miescach fiksavali kala 12 vidaŭ ryb. Praz try hady ryfy ŭžo vykarystoŭvali bolš za 60 vidaŭ, pavodle infarmacyi arhanizacyi Recfishwest.

Kanstrukcyja modulaŭ taksama spryjaje apvielinhu — pracesu, pry jakim bahataja pažyŭnymi rečyvami vada z hłybini padymajecca da pavierchni. Heta moža padtrymlivać fitapłankton i zoapłankton, jakija źjaŭlajucca asnovaj charčovych łancužkoŭ i zabiaśpiečvajuć ježaj bolš bujnych ryb.

Štučnyja ryfy raźmiaścili adnosna niedaloka ad bieraha. Banbieryjski ryf znachodzicca na hłybini kala 17 mietraŭ, a ryf kala Dansbara — prykładna 27 mietraŭ, tamu da ich mohuć dabiracca amatary rybałoŭstva na nievialikich łodkach.

Užo prykładna praz šeść miesiacaŭ značnuju častku bietonnych pavierchniaŭ pakryli vodaraści. Pobač z ryfami stali źjaŭlacca prydonnyja vidy ryb, u tym liku dchufiš. Praz krychu bolš za hod kanstrukcyi pačali zasialać karałavyja vodaraści, hubki, mšanki i inšyja marskija arhanizmy.

Pa miery taho jak štučny ryf zasialajuć vodaraści i bieschrybietnyja, jon pieratvarajecca z prostaj bietonnaj kanstrukcyi ŭ bolš składanuju padvodnuju ekasistemu. Marskija arhanizmy stvarajuć dadatkovyja krynicy ježy i schoviščy, što spryjaje źjaŭleńniu ŭsio bolšaj kolkaści vidaŭ.

Kamientary da artykuła