Mužčynu z-pad Žłobina, jaki žyŭ u Rasii, asudzili za palityku i intym ź niepaŭnaletniaj asobaj

38‑hadovy Siarhiej Kostka šmat hadoŭ žyŭ u Padmaskoŭi. Ale niadaŭna jaho asudzili ŭ Biełarusi. Homielski abłasny sud vynies jamu prysud pa cełym šerahu ciažkich artykułaŭ, siarod jakich nie tolki palityčnyja.

Siarhiej Kostka. Fota ź jahonaj staronki Ukantakcie

Siarhiej Kostka naradziŭsia ŭ 1988 hodzie ŭ ahraharadku Krasny Bierah Žłobinskaha rajona. Apošnija hady jon žyŭ u Rasii. Byŭ aktyŭnym karystalnikam rasijskich «Dziaržpasłuh», servisaŭ «Avita» i SDEK, zamaŭlaŭ tavary na adras u horadzie Istra Maskoŭskaj vobłaści.

U vieraśni 2026 hoda imia 38‑hadovaha Kostki źjaviłasia ŭ abnoŭlenym pieraliku «asob, datyčnych da ekstremisckaj dziejnaści». Zhodna ź infarmacyjaj siłavikoŭ, Homielski abłasny sud pryznaŭ jaho vinavatym pa niekalkich artykułach Kryminalnaha kodeksa. Adzin ź ich — heta palityčnaja častka 1 artykuła 361‑4 (sadziejničańnie ekstremisckaj dziejnaści). Zvyčajna pa im sudziać za pieradaču infarmacyi i fotazdymkaŭ pravaabaroncam ci žurnalistam.

Adnak mužčynu vystavili nie tolki palityčnyja abvinavačvańni. Kostku asudzili jašče i pa pakiecie seksualnych złačynstvaŭ — heta pałavyja znosiny z asobaj, jakaja nie dasiahnuła 16‑hadovaha ŭzrostu (č. 1 art. 168), vyrab i raspaŭsiud parnahrafičnych materyjałaŭ z udziełam niepaŭnaletnich (č. 2 art. 343-1) i ŭciahnieńnie niepaŭnaletnich u ździajśnieńnie złačynstva (č. 3 art. 172).

Ciapier Kostka adbyvaje pakarańnie. Dakładnyja detali taho, jak kryminalnaja sprava za seksualnyja złačynstvy pieraplałasia ź pieraśledam za palityku, zastajucca nieviadomymi. Ci to da Kostki pryjšli za Hajun ci niešta padobnaje, a ŭ mabilniku znajšli porna. Ci to jaho aryštavali za seksualnyja adnosiny, ale adšukałasia i niejkaje adno paviedamleńnie ŭ «ekstremisckija» kanały.

Nieviadoma i toje, ci byŭ Kostka ekstradavany z Rasii.

Samym ciažkim ź inkryminavanych jamu złačynstvaŭ ličycca ŭciahnieńnie niepaŭnaletniaha ŭ ździajśnieńnie złačynstva. Tut Kostka moh atrymać ad 5 da 8 hadoŭ kałonii.

Kamientary da artykuła