Prykładna pałova ludziej, jakija vyžyli paśla teraktaŭ 11 vieraśnia, zachvareła na rak
Praz 25 hadoŭ paśla teraktaŭ 11 vieraśnia 2001 hoda kala pałovy z prykładna 54 tysiač zarehistravanych ludziej, jakija pieražyli ataki, sutyknulisia z ankałahičnymi zachvorvańniami abo prachodzili lačeńnie ad raku. Pra heta piša The Washington Post.
Fota: Wikimedia Commons
Za apošnija piać hadoŭ kolkaść udzielnikaŭ prahramy World Trade Center Health Program, jakija atrymlivajuć dapamohu ŭ suviazi z rakam, vyrasła bolš čym utraja.
Daśledčyki źviazvajuć vysoki ŭzrovień zachvorvańniaŭ z taksičnymi rečyvami, jakija trapili ŭ pavietra paśla abrynańnia viežaŭ Suśvietnaha handlovaha centra. U pyle i dymie ŭtrymlivalisia aźbiest, bienzoł i inšyja kancerahiennyja rečyvy. Pažary na miescy katastrofy praciahvalisia jašče niekalki miesiacaŭ.
U červieni 2021 hoda dapamohu ŭ suviazi z ankałahičnymi zachvorvańniami atrymlivali kala 9 tysiač udzielnikaŭ prahramy. Da 2026 hoda ich kolkaść vyrasła bolš jak da 27 tysiač.
Miedyki papiaredžvajuć, što kolkaść dyjahnazaŭ moža praciahvać pavialičvacca, bo niekatoryja vidy raku mohuć prajavicca praź dziesiacihodździ paśla ŭździejańnia kancerahiennych rečyvaŭ.
Pavodle acenak ekśpiertaŭ, kolkaść ludziej, jakija ŭžo pamierli ad raku i inšych doŭhaterminovych nastupstvaŭ teraktaŭ 11 vieraśnia, pieravysiła 2977 čałaviek, jakija zahinuli niepasredna ŭ dzień atak. Pry hetym udzielniki miedycynskaj prahramy mohuć mieć nižejšuju śmiarotnaść ad raku dziakujučy rehularnym miedycynskim abśledavańniam.